"Guztiz onartezin" iritzi dio Eguzkik saneamenduaren aurreproiektuari
Bizilagunentzako "soluzio integrala" izango den plana galdegin du talde ekologistak, proiektuak saneamendu saretik kanpo utzi baititu 40-50 bat sanjuandar.
![](https://oarsoaldea.hitza.eus/site/files/2021/10/saneamiento-p-donibane.jpg)
Donibaneko saneamendurako aurkezturiko aurreproiektua “bertan behera” utz dadin galdegin du Eguzki erakunde ekologistak. Plan horren ordez, bizilagun guztiei erantzuna emango dien sarea sortzeko eskatu dute.
“Ahalik eta azkarren” irtenbide integrala emango duen beste proiektu bat idatz dadin ezinbestekotzat jo du Eguzkik, izan ere, aurkezturiko planteamenduak saneamendu-saretik kanpo utziko baititu 40-50 bat sanjuandar. Bestela esanda, horien ur beltzek zuzenean itsasoan bukatuko dute saneamendu sistema berria ezarri eta gero ere.
Bizilagunen zati handi bat ere ez dago ados soluzioarekin; hori dela eta, sinadura bilketa bat abiaraztea erabaki zuten joan den astean. Herritarren kezkez gain, legedia ere hartu du ahotan talde ekologistak: “Indarrean dagoen araudiari muzin eginez, hondakinak neurri batean itsasora zuzenean botatzea ahalbidetzen du aurreproiektuak, eta hori guztiz onartezina da”.
Hori esanda, “behar diren baliabideak” erabiltzeko eskaera egin die taldeak erakunde arduradunei, eta gaitzetsi du administrazio horiek ingurumena babesteko erakutsi duten “borondate eza”. Beste lehentasun batzuk dituztela uste dute: “Bien bitartean, prest daude legeak agintzen ez dituen megaproietuetan dirua xahutzeko eta beren eredu ekonomikoa bultzatzeko, diru publikoarekin, denon diruarekin”.