Berriro izan da garaile Gaizka Lopez, Zumaian oraingoan
Pasaia Kayakeko piraguistak Eskola Kiroleko bi jardunalditik bi irabazi ditu, Urola ibaian gora oraingoan. Azaroaren 13an izango dute hirugarren eta azken lehia.
![](https://oarsoaldea.hitza.eus/site/files/2021/10/irteera-infantilak-neskak-ona.jpg)
Joan den larunbatean lehiatu zuten Zumaian Eskola Kirola barruko bigarren piraguismo lehiaketa, eta Irunen lehenengoan egin bezala, garaipena lortu zuen Pasaia Kayakek haurren kategorian Gaizka Lopez taldekideari esker, baita beste ohorezko postu bat ere, Irungo markak hobetuz.
Kimu eta haur kategorietako neska-mutilek parte hartu zuten proban, guztira hamahiru kirolarik osatu zutelarik talde pasaitarraren ordezkaritza. Urola ibaian gora 1.500 metroko distantzia bete behar izan zuten lehen kategoriakoek, eta 3.000 metrokoa zaharrenek.
Lopezek hasieratik hartu zuen burua, ibilbidea 15 minutu eta 34 segundoko denborarekin bukatu zuelarik, 40 segundoko tarte esanguratsua ateraz atzeko piraguista nafarrari. Oinatz Alonso hirugarren izan zen haurrak B kategorian (lehenengo urteko haurrak), eta bigarren ohorezko postua lortu zuen Pasaiako klubak orotara.
Azaroaren 13an izango dute, etxeko uretan, hirugarren eta azken piraguismo jardunaldia Eskola Kiroleko gazteek. Arduradunek uste dute badian aritzea “pizgarri” izango zaiela, ahalik eta mailarik onena ematen saiatzeko: “Urtea zapore goxoarekin amaitzeko, etxekoen aurrean”.