Tiñelu biziberritzeko proposamena, larunbatean aztergai
Azken hilabeteetan bazkide talde batek landu duen proposamenaren berri emango diete elkarteko beste bazkide guztiei.
Asteburura begira berriro irekita egongo da Tiñelu. Tiñelu elkartearen barruan gogoeta egin dute azken hilabeteetan. 2019aren bukaeran ekin zioten zeregin horri. Helburua: elkartea biziberritzea, etorkizunari begirako hainbat erronkari eusteko. Jada gogoeta prozesua, Biziberritze Proposamena landu du horretarako espresuki bildu den bazkide taldeak. Orain, bazkide denei hori aurkezteko unea iritsi da.
Biziberritzerako agiria aurkezteko eguna larunbata (hilaren 30a) izango da. 11:30ean hasiko da Ibai Ondon egitekoa den batzarra. Bertan, biziberritzerako bidearen proposamenaren berri emango diete bazkideei.
Aldi berean, larunbateko bilkuran Ezohiko Batzar Orokorrerako deia egingo du zuzendaritza batzordeak. Azaroaren 13rako da batzarraldi proposamen hori. Han, larunbatean aurkeztuko den dokumentuaren onarpena izango dute hizketarako gai.
