Joanes Larretxea etxerako bidean jartzeko, kilometroak metro bihurtzeko deia
Joanes Larretxea Oiartzungo euskal presoaren etxeratzea eskatzeko, Joanes etxera! lelopean lasterketa herrikoia egingo dute 2022ko urtarrilaren 2an.
Joanes etxera1 lasterketa herrikoia aurkeztu du gaur Sare Herritarrak Joanes Larretxea Oiartzungo euskal presoaren etxeratzea eskatzeko, Joanes etxera! lelopean lasterketa herrikoia egingo dute 2022ko urtarrilaren 2an. Gaur aurkeztu du kirol iniziatiba Oiartzungo Sare Herritarrak, eta jendartearen nahiari jarraituta azken hilabeteetan maiz elkartu direla bakegintza eta elkarbizitza oinarri hartuta presoen auzia askatzeko garaia dela esateko nabarmendu du.
Ezinbestekoa jo du euskal presoen aldeko dinamikak, espetxe politika definitzen duten estatuengan eragitea, “aurrera urratsak egitea guztion ardura baita”. Giltza gizarte zibilaren aktibazioa dela gaineratu du Sarek gaurko agerraldian, “eragile politikari. alderdi, ordezkari, sindikatu, instituzio, eta norbanako guztion aktibazioa eta inplikazioa bultzatzea da gakoa”. Espetxe politika aldatzeko kontsentsua erabatekoa dela ikusarazi dutela behin eta berriz ere gaineratu du dinamikak, eta presoei ezartzen zaien salbuespen legediarekin amaitzea beharrezkoa jo du enegarrenez, “Joanes etxerako bidean jarri behar dugu, kilometroak metro bihurtu behar ditugu”. Hamabi urte bete ditu preso Larretxeak eta egun Martuteneko espetxean aurkitzen da oiartzuarra.
Joanes etxera1 lasterketa herrikoia aurkeztu du gaur Sare Herritarrak
Oiartzungo herri lasterketa ekarpena da bide horretan, eta kilometroak metro bihurtzeko egiteko horretan herritar denak nahi ditu konplize Sare Herritarrak, “parte hartzera animatu nahi ditugu herritar guztiak, lasterketarekin bat egitera”.
Sei kilometro eta erdiko ibilbidea du herri lasterketak eta hilaren 30era arte izango da izena emateko aukera Elorsoro Kiroldegian edo online; prezioa 8 euro. Egunean bertan ere izango da aukera izena emateko, orduan 12 euro ordaindu beharko dira.
Haurren lasterketari dagokionean lasterketa egunean bertan izango da izen ematea.
Esan moduan, urtarrilaren 2an izango da lasterketa (igandea). 10:30ean izango da haurrena eta 11:00etan herri lasterketa. Sari banaketa, berriz, 12:30ean egingo dute.
