[Galeria eta bideoa] Herritarrei hitza emango dien prozesu loteslea galdegin dute antxotarrek
Dozenaka izan dira gaur eguerdian kalera atera eta euren hitza eta iritzia aintzat hartzea nahi dutela eskatu duten antxotarrak SOS Antxo Koordinadorak deitutako manifestazioarekin bat eginez.
SOS Antxo koordinadorak deituta manifestazioa egin dute. Dozenaka izan dira gaur eguerdian kalera atera eta euren hitza eta iritzia aintzat hartzea nahi dutela eskatu duten antxotarrak. 13:00etan abiatu da manifestazioa Gure Zumarditik, euripean, SOS Antxo koordinadorak deituta. Garbi utzi dute euren eskaera: “Udal agintariei eta Euskotreni herritarrei hitza emango dien prozesu parte hartzaile loteslea ahalbidetzeko dei egin nahi diegu”.
Luze joko dute Euskotrenen lurpeko geltoki berria egiteko lanek, “gutxienez bost urte”, eta bitarte horretan antxotarren bizitza sozial, ekonomiko eta kulturala erabat baldintzatuta egongo dela aurreikusi du koordinadorak. Halako obra handia izanik, eta herritarrengan hainbeste eragingo duenez, haren funtsezko alderdiei buruz jakin nahi dute, baita erabaki ere. Kezka nagusia, gaur-gaurkoz, topoko egungo zubibidearen etorkizuna da, “dakigunez ez dute eraitsiko lurperatze lanak amaituta, eta egun bezala geldituko da zehaztu gabeko denbora tartean”. Horren harira galdera: “Zertarako jasan lanek ekarriko dizkiguten eragozpen guztiak, onurarik onena beteko ez bada?”. Trenbide saihesbidearen idazketari erreparatu diote ondoren; bederatzi hilabete iraungo ditu koordinadoraren esanetan eta berebiziko garrantzia du, lan horrek zehaztuko duelako zenbat urte eta zein egoeretan jarraitu beharko duten topoaren egungo trazadurarekin lurperatze obra amaitutakoan. Denbora tarte hori, bederatzi hilabeteak, itxaroteko prest azaldu da SOS Antxo, baina epea behin pasata herritarren erabaki lotesleak hartzen amaituko den informazio prozesu parte hartzailea zabaltzeko eskatu dio udalari eta Euskal Trenbide Sareari.
Gaurko protestaren barruan antxotarrentzat argi izpi bat. Luzuriagaz hitz egin dute eta “positiboki” egin dute, “Madrilen lortutako egoera berriek Azokaren ordez Biteri Plazan eraikin berria egiteko alkatetzaren erabakia berriro aztertzea ahalbidetzen duelako. Herritarren ahalegina eta lanari esker, Antxok merezi dituen kultur eta zerbitzu jardueretarako nahi den eraikin bilakatuko da Luzuriaga”.
Herritarren mobilizazioak fruituak ematen dituela berretsi du azkenik SOS Antxo koordinadorak, eta horretara deitu du, merezi duten Antxo egi bihurtzeko.
