"Muga-mugan jarraitzen dugu lanean, eta ez dago bitartekorik"
Bitartekorik gabe, pandemiak eragindako seigarren olatua gainean, eta muga-mugan. Hala sentitzen dira, hala ari dira egunero lehen arretako osasungintzako langileak, eta egoera hori salatzeko kalera aterako dira bihar anbulatorioetan.
Iazko irailean Iztietako anbulatorioan egindako protesta bat. Argazkia: Mikel Martin Bitartekorik gabe, pandemiak eragindako seigarren olatua gainean, eta muga-mugan. Hala sentitzen dira, hala ari dira egunero lehen arretako osasungintzako langileak, eta egoera hori salatzeko kalera aterako dira bihar anbulatorioetan. Errenteria-Oreretan, Iztietako anbulatorioko langileek bat egin dute gehiengo sindikalak deitutako protestarekin. 13:00etan hasita hamar minutuz elkarretaratuko dira anbulatorioaren kanpoaldean, eta herritarrak deitu dituzte mobilizazioarekin bat egitera.
Araba, Bizkai eta Gipuzkoako Lehen Mailako Arreta “arrisku bizian” dela salatu dute Satse, ELA, LAB, CCOO eta UGT sindikatuek, “zerbitzua desegiteko programatutako estrategiekin jarraitzen dute. Osakidetzak COVID-19aren pandemiaren atzean estaltzen jarraitzen du zerbitzu horren egiturazko defizita, eta premiazkoa da hori berregitea”. Eskaera zehatzak egin dituzte: Lehen Mailako Arretaren eta bertako profesionalen egungo egoera hobetzea.
Familia eta komunitateari ematen zaion arretak “okerrera” egin duela ere salatu dute eta horren arrazoia “interes politikorik eza” dela diote. Muga-mugan ari direla lanean esan dute, baliabide nahikorik ez dagoelako, ez errefortzurik, ezta ordezkapenik ere, “hori gutxi balitz ez da ahalegina aitortzen eta ez dira langileen eskubideak errespetatzen”. Lehen Mailako Arretaren narriadura ez dela berria ere azaldu dute bertan lanean ari diren profesionalek, “denbora daramagu inbertsio gehiago eskatzen, borondate politiko handiagoa sektore hori indartzeko, lan egonkortasun handiagoa, errespetua, aintzatespena, antolaketa hobea eta , finean, lan baldintza hobeak”.
Adabakiak jartzeari uzteko eskaera egin dute, “Lehen Mailako Arreta sendo baten aldeko apustua egiten dugu, beharrezkoak diren erreformak egiteko”.
Lehen Mailako Arreta, Nik bai lelopean hartuko dituzte anbulatorioetako sarrerak biharko protestaren bidez, eta bertan nahi eta behar dituzte osasungintzako langileek, herritarrak.
COVID Ziurtagiria, gobernuen kudeaketa okerra estaltzeko
LAB sindikatuak da biharko elkarretaratzeetako sindikatu deitzaileetako bat. COVID ziurtagiria gobernuen kudeaketa okerra estaltzeko erabiltzen ari direla salatu du, eta osasun sistema publikoaren alde mobilizatzeko deia egin du: “Ez dago nahikoa justifikaziorik COVID ziurtagiria ezartzeko, euskal herritarren %90 inguru txertatuta badago”. Neurriaren atzean, fokua horretan jartzeak, kudeaketa instituzionalaren gabeziak estaltzeko helburua jarri du LABek, eta gogor salatu, berriro ere, herritarrengan jarri dutela erantzukizuna, “gobernuen kudeaketaren hutsuneak eta aurreikuspen okerrak ezkutatzeko”.
COVID ziurtagiriarekiko kritikoak badira ere, neurri horren kontra emandako hainbat ikuspegirekin ez deula bat egiten azaldu du LABek, “izan ere, azken urteotan neoliberalismoak eragindako indibidualismoan sakonduz, norbanakoen askatasuna zaintza kolektiboaren gainetik jartzen duten erreakzioak eman dira; eskuin muturrak baliatu nahi dituen erreakzioak, hain zuzen ere”
Sindikatu abertzaleak gainera, bost ardatzetan neurriak hartzeko eskatu du: COVID ziurtagiria bertan behera utzi; konfinatutako haurren guraso guztientzat zaintza baimena ezarri; prebentzio neurri eraginkorragoak hartu; osasun eta zaintza sistema publikoa indartu; eta pandemiak langileongan eragindako ondorioei aurre egitea. Esteka honetan sakatuta zehatzago irakur daitezke neurri horiek.
