Fanderiako Errota egitarau berriarekin dator
Ibaiaren Etxeak datozen hiru hilabeteetarako egitaraua aurkeztu du. Jarduerak igande honetan hasiko dira, eta parte hartzeko, beharrezkoa da aurretik izena ematea.
Fanderiako Errota. Fanderiako Errotako Ibaiaren Interpretazio Zentroak (Ibaiaren Etxea) apirila bitarteko jarduera bereziak aurkeztu ditu. Egitaraua igande honetan hasiko da, hilaren 6an. Hezeguneen mundu egunaren astea dela aprobetxatuz, Fanderiako putzuko bizilagunak ezagutzeko aukera egongo da, berriki Oiartzun ibaiaren ondoan egin den urmaela baliatuta.
Ekintzak martxoaren 20an itzuliko dira, eta Oiartzun ibaiko urek Fanderia auzotik igarotzerakoan nolako kalitatea duten aztertuko da egun horretan.
Egitaraua apirilean bukatuko da azken bi jarduerekin. Lehena hilaren 14an izango da, eta herriko parkeetan topa daitezkeen landareak ezagutzeko ibilbide bat egingo da. Azkena, berriz, hilaren 16an burutuko da, eta familian jolasteko errotari eta ibaiari buruzko pista jolasa egingo da Fanderian.
Ekintza berezi hauez gain, Ibaiaren Etxeak hilabeteko bigarren asteburuan, 10:30etik 14:00etara, errota martxan ikusi eta bere historia ezagutzeko aukera ematen du.
Ibaiaren Etxetik antolatu diren jarduera guztiak doakoak dira, baina aldez aurretik izena eman behar da parte hartzeko. Bertaratu nahi dutenek, turismoa@oarsoaldea.eus edo galemysfanderia@gmail.com helbide elektronikoetara idatzi edo 943 49 45 21 edo 690 72 02 64 telefono zenbakietara deitu beharko dute.
