Topoaren bilera Ibaiondora lekualdatuko dutela iragarri du alkateak
Sarrera gehiago eskuragai jarri dituzte jada. EH Bilduk "behar beste bilera" deitzeko galdegin dio Izaskun Gomezi.
Ibaiondo pilotalekuaren barruan egingo da, Izaskun Gomezek aditzera eman duenez, topoko obren aurkezpen bilera. 
Gaur goizean iragarri du Izaskun Gomez alkateak, hainbat eta hainbat herritarren eta EH Bilduren eskaerei erantzunez, Kultur Etxean egitekoa zen topoaren bilera Ibaiondo frontoira lekualdatuko dutela.
Udalburuaren arabera, kokagune berria aurretik ez hautatu izanaren arrazoiak bilera zuzenean online eman ahal izateko arazoak lirateke. Horiek udal langileek konpondu dituztela azaldu du eta, hori horrela, aurrez aurre nahiz online jarraitu ahal izango dela Ibaiondoko saioa ere.
Data eta ordua bere horretan mantenduko dira (datorren asteazkenean, hilak 9, 19:00etan). Horrez gain, egunera arte gonbidapena eskuratu ez duenak aukera izango du orain hemen klik eginda, sarrera gehiago jarri baititu udalak eskuragai.
Kultur Etxeko saioko gonbidapenak bi egun baino gutxiagoan agortu izanak hautsak harrotu zituen atzo bizilagunen artean. Pasaiako EH Bilduk bat egin zuen kezka horrekin eta Gomezi galdegin zion “behar beste bilera” deitzeko, harik eta herritar guztiek euren kezkak argitu arte.
Lehen aretoak 54 lagunentzako edukiera besterik ez zuen ahalbidetzen. Kontuan hartuta SOS Antxo Koordinakundeak berriki gaiarekin kezkatuta dauden 1.500tik gora antxotarren sinadurak jaso dituela, “onartezin” iritzi diote bilkideek hasieratik halako toki murritza proposatu izanari.
Horrez gain, oposizioko koalizioak proposamen berria egin dio alkatetzari: informazio-saioa online jarraituko duten pertsonek “modu aktiboan” parte hartu ahal izatea, eurek ere iradokizun edo galderak egin ditzaten ahalbidetuz.
