Bidea hasi zutenetik gorenean dago Antxo Areto Futbol taldea
Hiru talderekin ari dira lehian zuri-gorriak lehenengoz. Taldekide gehienak antxotarrak direla nabarmendu dute, eta orain, emakumeen taldea eratzea dute helburu.
Antxo AFko hiru taldeetako partaideak, sasoi hasieran atera zuten argazkian. Oarsoaldean nahiz Irunen eta Hondarribian Antxo Areto Futbola-Pescados Alberto Ferreres da mailarik gorenean dagoen areto futbol taldea. 2012an sortu zuten kirol egitasmoa hainbat kirolarik, eta urtetik urtera hazten joan da: bidea egiten ari den sasoian, lehen taldea Hirugarren Nazionaleko lider da; bigarrena maila handia azaltzen ari da bigarren urtez Gipuzkoako Hirugarren Mailan, eta Gazte Mailakoak lehen golak sartzen hasi dira 2021-2022 denboraldian. «Kluba osasuntsu dago. Inoiz baino handiagoa da. Hori, batez ere, kirolarien eta antxotarren konpromisoagatik da. Ezin dugu gehiago eskatu», azaldu du Alberto Ferreres ekipoaren presidenteak.
Ferrerresek nabarmendu du, gainera, jokalari gehien-gehienak antxotarrak direla, eta horrek nortasun berezia ematen diela talde guztiei. Gainera, izate horrekin herritarren atxikimendua lortu dutela azaldu du, eta ez bakarrik partidetan jasotzen duten babesarena. Horren adibide bat jarri du: «2019ko eta 2021eko Gabonetako loterietan, guk ateratako zenbakiek saria izan zuten, ez handia, baina saria. Bazkideen artean saldu zen gehienbat zenbaki hori. Bada gehienek ez zuten zegokien diru kopurua eskatu, guretzat gelditu zen. Horrek ekonomikoki hauspoa eman digu». Diru kontuetan haizea alde, baita kirol arloan ere.
Hirugarren Nazionaleko taldea da horren adibide: bigarren itzulia hasi berri denean, euren multzoko lider dira Bigarren B-ra igotzeko (play-off bitartez erabakiko da igoerako plaza) aukera sendoekin. Gainera, Gipuzkoako (finalerdietan daude) nahiz Euskadiko Kopan bizi-bizirik daude. «Kluba ia hutsetik sortu zen. Lehen taldea Bigarren B-ra igotzea nahi nuke, inork ezer oparitu gabe demostratu dugulako aurrera egin daitekeela. Taldekideengatik ilusio itzela egingo lidake igotzea», adierazi du Ferreresek.
Emakumeen taldea
Antxon AFn duten arantza bakarra emakumeen taldea sortu ezin izana da. Saiatu dira, baina ezin. «Antxon badaude taldea sortzeko adina kirolari. Baina zaila da, gehienak ikasten ari direlako, asko kanpoan. Ezin dute entrenatu, beraz, taldea osatu. Baina baikorra naiz: lortuko dugu. Orain beharbada ez, baina lortuko dugu emakumeen taldea ateratzea. Saiatuko gara behintzat».
