Euriak ezin izan ditu pentsiodunak geldiarazi
Pentsiodunek argi utzi dute borrokan jarraituko dutela "gure pentsioak eta belaunaldi berrienak bermatu arte". Larunbatean Bilbon antolatu den mobilizazioetan egongo dira, eta horretarako autobusak antolatu dituzte Gipuzkoatik.
Pentsio publiko duinen aldeko mobilizazioa. Hilabeteko lehen astelehena eurena dela argi utzi dute pentsiodunek berriro ere. Euria lagun izan badute ere, pentsiodunak kalera atera dira pentsio publiko duinen alde borrokatzen jarraitzeko. Lau urteko borroka honi eutsiko diotela zehaztu dute: “Gure pentsioak eta belaunaldi berrienak bermatu arte pentsioak defendatzen jarraituko dugu”. Lau urte horietan antolatu diren mobilizazio, elkarretaratze eta manifestazioek erakutsi dute “Euskal Herriko pentsiodunen mugimenduak bizirik eta indartsu” jarraitzen duela, eta urtarrilaren 15ean egin zen manifestazioan “argi ikusi” zela euren indarra.
Pentsiodunen mugimenduak mobilizazioak antolatu zituen urtarrilaren 15ean Euskal Herriko lau hiriburuetan. Manifestazio horiek estatu guztian egiteko programatuak zeuden, baina beste erkidegoetan ezin izan zituzten aurrera eraman. Hori dela eta, Espainia mailan larunbat honetara, hilak 12, pasa dituzte mobilizazioak, eta Euskal Herriko pentsiodunek adierazi dute “elkartasunagatik” eurak ere manifestazio bat egingo dutela. Mobilizazioak Bilbon izango dira larunbat honetan, eta Gipuzkoatik autobusak antolatu dituzte Bilbora joateko.
Bankuekin izaten diren arazoak ere izan dituzte hizpide pentsiodunek, eta gaurko manifestazioan Kutxa aurrean gelditu dira minutu batzuez aldarrikapenak egiteko. Pentsiodunek eutsi dute herri txikietan banku sukurtsalak ixten ari direla, eta helduenek euren herriak utzi behar dituztela bankura joateko. Horrez gain, helduenei bankuetan ematen zaien arreta “hobetzea” eskatu dute. Aldarrikapen horiek hobetzeko, hainbat udaletan mozioak sartu dituztela aipatu dute pentsiodunek, eta udal gehiagotan sartzen ahaleginduko direla azpimarratu dute.
