Urdaburuk hamar etapako proiektua abiatu du
Etapak Tolosaldean barrena murgilduko dira ibilbide zirkular bat egiteko. Lehena otsailaren 19an izango da, eta sei orduko ibilbide bat egingo dute Tolosa eta Berastegi artean. Izen emateak irekita daude.
Uzturre mendia. Argazkia: Mendikat. Urdaburu Mendizale Elkarteak hamar etapako proiektu berri bat antolatu du, eta Tolosaldean barrena murgilduko dira ibilaldi zirkular bat egiteko. Egitasmoak otsailaren 19an, larunbata, izango du lehen etapa. Lehen etapa hori Tolosan hasi eta Berastegin bukatuko da sei orduko ibilbidea osatu ondoren, eta Uzturre, Urdelar eta Larreko gailurrak igaroko dituzte. Mendi irteera goizekoa izango da, bazkalorduan etxera itzultzeko, izan ere, COVID-19aren egoera dela eta, etaparen bukaeran bazkaltzeko lekua aurkitzeko zailtasunak izan dituzte elkarteko kideek.
Autobusa goizeko 07:30ean irtengo da Zumardiko autobus geltokitik, Panierren noranzkoan dagoena. Parte hartzeko, izena hiru modutara eman daiteke: Urdabururen egoitzan astearte eta ostegunetan 19:00etatik 21:00etara; 943 52 78 79 telefonora dei eginez; edo hurrengo formularioa betez.
