32.000 kilo organiko konpostatu dituzte 2021ean lezoarrek
Lezoko bost konposta guneetako erabiltzaileak zoriondu ditu udalak. Konpostaren kalitatea egokia dela adierazi du.
2021ean, Lezoko bost konposta guneetan 32.000 kilo hondakin organiko utzi zirela jakinarazi du Lezoko Udalak. Zifra hori 2020koa baino altuxeagoa dela baieztatu du udal erakundeak. Horrez gain, gune horietatik 2021ean zehar hamabi lagin jaso, eta aztertu dira: emaitzen arabera, herriko konposta guztiz segurua da eta indarrean dauden betebehar mikrobiologiko guztiak betetzen ditu. “Izugarrizko lana egiten ari zarete!”, esan die udalak egitasmoarekin bat egin dutenei.
Altamiran, Andreonen, Aralarren, Arretxenen eta Lopenen daude herriko konposta eremuak. Herritarren ekarpenaz gain, adituek eta teknikariek hainbat bisita egiten dituzte horietara dena ondo doala ziurtatzeko, nahiz konposta egileen ekarpenen eta kezken berri jasotzeko. Zortzi bisita egin ziren iaz, eta aurten ere hala izango da: otsaila, apirila, maiatza, ekaina, uztaila, iraila, urria eta abendua izango dira bisitarako hilabeteak (egun eta ordutegi zehatza aurrerago horiek iritsi ahal emango ditu udalak).
Bisiten eta laginen gaineko informazioa egitasmoarekin bat egin dutenekin partekatzen dute, bilera batean. Urtarrilaren bukaeran egin ohi da bilera hori. Baina udalak jakinarazi du aurtengoa (iazkoa bezala) ez dela egingo, osasun segurtasun neurriengatik.
Guneetarako bisitez gain, udalak zehaztu du hainbat hobekuntza egin dituela eremuetan azken urteetan. Adibidez, Aralarreko, Arretxeneko eta Lopeneko guneak zaharberritu dira, eta konpostagailu txikiak handiagoekin ordezkatu dira.
Beti dago zabalik konpostaren egitasmoarekin bat egiteko aukera. Hori egiteko, nahiz xehetasunak eskuratzeko, 647 05 74 02 telefono zenbakira Whatsapp mezua bidali daiteke, edo ondoko helbide elektronikora idatzi.
