Lezoko kirol guneetako langileen protesta, udaletxearen aurrean
Bizi duten egoeragatik borrokaldian ari dira Altzate igerilekuko eta Bekoerrota kiroldegiko langileak.
Langileak, gaurko elkarretaratzean. Altzate igerilekuko eta Bekoerrota kiroldegiko langileek elkarretaratzea egin dute gaur goizean udaletxearen atarian, LABek deituta. Aski da, konponbideak orain lelodun pankartarekin ezaugarritu dute mobilizazioa.
Hainbat kezka dituzte kirol eremuetako langileek. Batetik, herriko kirol instalazioen gaineko ezinegona dute, hainbat eremu egoera eskasean daudela uste dutelako eta hori erabiltzaileen nahiz langileen kalterako dela. Bestetik, kexu dira haien arabera 2014tik udalak ez duelako lehiaketara atera kirol gune horien kudeaketa, eta BPXport enpresa behin-behinean ari dela horiek kudeatzen “horrek dakarren ezegonkortasunarekin”.
Soldaten arrakalaren gaineko kezka ere badute: instalazioetan lanean hasi diren azkenek, lehendik zeudenen lan hitzarmen ezberdina dute Gipuzkoako hitzarmena 2012tik berritu ez delako, eta herrian bertan tokiko akordioa lortzeko aukerarik izan ez delako: “Lanpostu berean ordu kopuru berbera lan egiteagatik, langile batek 400 euroko aldea izan dezake hilabeteko soldatan beste batekiko”.
