Martxoaren 8aren bueltako ekintzen berri eman du Itaiak
Emakumeen Nazioarteko Egunaren karietara, hainbat iniziatiben berri eman du antolakundeak: lehena Oreretan izango da, eta Lezon bigarrena.
Martxoak 8, Lezon. Artxiboko irudia. 
Martxoaren 8aren atarian, egitaraua prestatu du Oarsoaldeko Itaiak. Oraingoz Errenteria-Orereta, Lezo eta Donostian badute hitzordua, baina datozen egunotan euren sare sozialetan ekintza gehiagoren berri emango dutela aditzera eman dute, bai eta dagoeneko aurreraturikoaren gainean xehetasun gehiago eman ere.
Hona hemen, gaur artean aurreratu duten informazioa:
- Hilak 19, larunbata. Oreretako gaztetxean, 12:00etatik aurrera, batzar informatiboa eta Martxoaren 8rako prestaketa eingo dute. Mobilizatzeko arrazoiak zeintzuk diren eta Itaiak problematikoa femeninoaren aurrean duen irakurketa plazaratuko dute. “Ez da ezer ekarri behar”, ohartarazi dute taldekideek, “guk jarriko ditugu baliabide guztiak”.
- Martxoaren 5a, larunbata. Lezoko Txerimuño baserrian egun osoko egitaraua antolatu dute. Xehetasunak datozen egunetan emango ditu Itaiak, baina aurreratu dute proiekzio, eztabaida eta bazkari bana egiteko asmoa dutela.
- Martxoaren 8a, asteartea. Donostiako Gipuzkoa plazan, 18:00etan, Itaiak deituriko mobilizazioarekin bat egitera deitu dute. Oarsoaldeko bizilagunak aurretik elkartzeko hitzordua 17:45ean finkatu dute; plaza ondoko ordularian gelditu eta elkarrekin joango dira, Emakume langileok askatzeko sozialismoa eraiki lelopean.
