Merkataritza eta Ostalaritzako Aholku Kontseilu berria aurkeztu dute
Udaleko gainerako aholku kontseiluen maila juridiko berdina eskuratu du 2019an sortu zen mahaiak, izaera deliberatzailearekin batera.
Merkataritza eta Ostalaritzako Aholku Kontseilu berria aurkeztu dute. Udalaren gainontzeko aholku kontseiluekin parekatuta, gaur eguerdian formalizatu egin dute Merkataritza eta Ostalaritzako Aholku Kontseilu berria. 2019an merkataritza eta ostalaritzari zegozkien gaiak lantzeko sortu zuten mahaia, eta bertan Errenteriako Udalak, Errenkoaldek, Errenteriako Merkatu Merkatarien Elkarteak, Ostari elkarteak, Oarsoaldea Garapen Agentziak eta merkatari independenteen talde batek parte hartu zuten hasieratik. Mahaia orain artean funtsezkoa izan dela adierazi dute, Errenteriako Merkataritza Indartzeko Plan Berezia garatzeko. Orain, ordea, mahai honek gainontzeko aholku kontseiluen maila juridiko berdina eta deliberazio izaera eskuratu ditu. Neurria udalbatzan onartu ostean argitaratu dute, merkataritza eta ostalaritzako eragileen eskaerari jarraiki.
Hala nola, eguerdiko prentsaurrekoan pandemian zehar mahaikideek zenbait neurri abiarazi zituztela azaldu dute; tokiko kontsumorako bonuen kanpainak, mikroenpresak babesteko dirulaguntzak edo ostalaritzako dirulaguntzak, besteak beste. Hortaz gain, aholku kontseilu berriak merkatarien, ostalaritzaren, udalaren edota herritar-sareen arteko harremana hobetzeko ere balio izatea espero dute.
