"Pozik" baloratu du SOS Antxok topoaren lanei buruzko informazio saioa
Guardia jaitsiko ez dutela ere berretsi du elkargoak, eta bilkuran egon zirenei "notario gisa" jarduteko eskatu diete, konpromisoen berme.
Juan Olalde antxotarrak hartu zuen hitza joan den asteazkeneko bileran, SOS Antxo Koordinakundearen izenean. 
SOS Antxo Koordinakundeak “pozik” baloratu ditu joan den asteazkeneko Ibaiondoko informazio bilera eta bertan hartutako konpromisoak.
Modu positiboan balioetsi ditu 1.500dik gora lagunek babesturiko erakundeak, besteak beste, alkateak Luzuriagarentzat dituen planak, udalburuak iragarri baitzuen parte hartze prozesu bat ireki asmo zuela, antxotarrekin batera bulego zaharretan zer egin erabakitzeko.
Aldi berean, asebete agertu dira bizilagunak orain dela hilabete batzuk inkognita ziren gaiak argitutzat eman zituztelako Izaskun Gomezen eta ETSko arduradunen azken adierazpenekin: Biaduktua eraisteko konpromisoaren gainean informazio berria eman zuten arduradunek, berretsi baitzuten merkantzien garraiorako ordezko bide bat aurkituko ez balitz ere, biaduktuaren etorkizuna bera litzakeela, ezbairik gabe.
Azken promesa horren arira, bertaratutako guztiei galdegin die koordinakundeak “notario gisa” jarduteko: “Zoritxarrez ezin baikara lasaitu, asko baitira Pasai Antxorekin konpromisoa hartu eta gero gauzatu ez direnak”. Anbulatorioa eta Luzuriagaren bigarren fasea jarri dituzte adibide.
Hori horrela, udal arduradunei lankidetzan aritzeko prestutasuna adierazi diete taldeko kideek: “Bai Luzuriagako parte-hartze prozesurako, eta baita obraren eraginak ahalik eta txikienak izan daitezen ere”.
