Antxoko bilera "berantiarra" positibotzat jo du EH Bilduk
Oposizioko koalizioak informazio saioa berandu heldu dela uste du, baina onuragarritzat jo dute, hala eta guztiz ere, azken emaitza.
150 bat lagun bertaratu ziren joan den asteazkeneko bilerara. Bertan izan ziren EH Bilduko ordezkariak. 
EH Bilduk, SOS Antxo Koordinakundeak aurretik egindakoaren bidetik, asteazkenean Pasai Antxon izandako informazio bileraren gaineko balorazio publikoa egin du. Bilkura berandu heldu dela uste badute ere, “positibotzat” jo dute bertan emandako informazioa nahiz bizilagunen parte hartzea.
Emaitza orokorra ontzat jo badute ere, topoaren lanekin zuzenean loturiko zenbait gai oraindik airean daudela iritzi dute bilkideek. Besteak beste, obraren kronograma zehatzik ez dagoela eta egungo zubibidea eraisteko sinatutako eta tasatutako akordiorik eman ez izana deitoratu dute.
Azken horri dagokionez, Eusko Jaurlaritzari eta Pasaiako Udalari eskatu dete bi erakundeek sinatutako hitzarmen batean islatzeko zubibide zaharra saihesbide berria martxan hasi eta berehala eraisteko konpromisoa. “Antxotarrak hainbeste irrikatzen eta espero duten albistea ezin da prentsa-ohar soil batean edo asmo-adierazpen soil batean geratu”.
Atzera begirakoa eginda, azken hilotan izandako bizilagunen mobilizazioak ez dituzte ahaztu, eta udal gobernuaren urratsak “xehetasunez” jarraitzeko konpromisoa berretsi dute: “Behingoz denok norabide berean arraun egin dezagun, beti ere herritarrekin batera”.
