Lidergoari eutsi dio San Juanek Batel Ligako bosgarren jardunaldian
Gaur goizean Zumaian lehiatu da 2022 Gipuzkoako Batel Ligako bosgarren estropada. Onena eman dute bertan San Juan, Hibaika eta San Pedrok.
Zumaian lehiatu da, gaur goizean, Gipuzkoako Batel Ligako bosgarren jardunaldia. [Argazkia: Zumaia Turismoa]. 
Bosgarrena izan da gaur goizean Zumaian lehiaturiko Gipuzkoako Batel Ligako estropada. Bertan izan dira, jakina, Hibaika, San Juan eta San Pedroren 25 batelak, eta emaitzetan islatu da eskualdeko arraunlariek eginiko esfortzua, berriro ere sanjuandarrak gailendu direlarik palmaresean.
Haur mutilen kategorian sanpedrotarrek mantendu dute egunera arteko lidergoa -Oarsoaldeko ontzien artean, betiere-, hirugarren sailkatu delarik A ontzi morea. Horren atzean, laugarren gelditu dira San Juan A-ko arraunlariak. Haur nesken artean, dominarik ez; Hibaika A bosgarren izan da.
Promesa mutiletan urrea sanjuandarrek erdietsi dute, eta kategoria bereko nesken artean ere gailendu dira arrosak, San Juan B podiumera sartzeko zorian gelditu delarik, laugarren.
Gazteen artean, ezbairik gabeko nagusitasuna, berriro ere, Pasaiako arrosentzat. Laugarren jardunaldiko ohorezko postuak errepikatu dituzte gaur ere: Mutiletan San Juan A eta San Juan B lehen eta bigarren, eta nesketan San Juan irabazle berriro.
Absolutu mutilen kategorian lehian ari den eskualdeko batel bakarra sanjuandarrena da, eta azkenurren bukatu dute horiek gaur. Nesken artean, hiru dira norgehiagokan izena emana duten ontziak, eta hala sailkatu dira: Hernani, Hibaika eta San Juan.
Bosgarren jardunaldiko sailkapen osoa Gipuzkoako Arraun Federakundearen orrian kontsulta daiteke.
