Zuntz optikoa San Pedro eta Donibanera helduko da "datozen asteotan"
Loreto Osa Hirigintza zinegotziak iragarri du, arau aldaketa bati esker, banda zabalaren luzapen eraikinen fatxadetatik egin ahalko dela.
Zuntz optikoa fatxadetatik garraiatu ahal izango da araudiaren aldaketa bati esker. 
Loreto Osa Hirigintza zinegotziak jakinarazi duenez,”datozen asteotan” aukera izango dute pasaitar guztiek euren etxeetara zuntz optikoa helarazteko. Egokiera hori legediaren aldaketa bati esker etorriko da, orain arteko araudiak zuntza lurpean instalatzeko aukera baino ez zuelako ematen; oraindik aurrera, ordea, eraikinen fatxadak erabili ahalko dira.
Pasaian kokaturiko 1.010 etxebizitzak ez dute oraindik zuntz optikoa kontratatzeko aukerarik; zehatzago, San Pedroko hirigune historikoko 380 eta Donibaneko 630 dira konexio mota hori ez duten etxeak.
Osak aitortu du pandemiak agerian utzi duela telekomunikazio zerbitzuaren beharra, eta horretxegatik berak zuzentzen duen sailak txosten juridiko bat egin du, zuntza eraikinen fatxadetan zehar garraiatzea baimentzeko. Zinegotzi arduradunak ohartarazi du, dena den, fatxadetako instalazioak ahal den unean lurperatu beharko dituztela telekomunikazio konpainiek eta jabeen erkidegoek.
Gipuzkoako Foru Aldundiak txostenari “eragozpenik jarri ez” diola adierazi du Osak eta, beraz, banda zabalaren luzapena “datozen asteetan” gauzatu ahal izango dela, norberaren telefono konpainiaren bitartez ohiko prozedurari jarraituz.
