Pala motzeko partida erabakigarria jokatuko da bihar
EPLEko Eyheramendy eta Ruben nor baino nor ariko dira bihar Fanderian Artepeko bikotearen aurka. Irabaziz gero, saria handia izan daiteke: finalerdietara sailkatzea.
Julen Aranburu pilotaria partida batean. Argazkia: Gipuzkoako Euskal Pilota Federazioa. Euskal Ligako Ohorezko Mailako pala motzeko partida erabakigarria jokatuko da bihar Agustina Otaola pilotalekuan. 19:00etan hasiko den norgehiagokan, EPLEko Eyheramendy eta Ruben Artepeko bikotearen aurka ariko dira nor baino nor. Bi bikoteak bolada onean dira, eta honakoa izango dute ligaxkako azken jardunaldia. Irabaziz gero, saria handia izan daiteke: finalerdietara sailkatzea. Lehia, baina, estua da, zenbait bikote baitaude hurrengo fasera sailkatzeko borrokan. Partida handia espero da.
Txapelketa horrekin jarraituz, EPLEko Ezkerro eta Abelek etxeko lanak eginak dituzte, eta finalerdietarako sailkatuak daude dagoeneko. EPLEko bikoteak bigarren postuan bukatu du bere multzoan.
Eskuz binakako Ohorezko Mailari dagokionez, Etxezarretak eta Arangurenek ere partida erabakigarria jokatuko dute larunbatean Irurtzunen ligaxkako azken jardunaldian. Eskuz jokatzen ari den txapelketan ere lehia bizia da, bikote asko baitaude finalerdietara sailkatzeko borrokan, eta EPLEkoak gogor ahaleginduko dira bertan egoteko.
Batzokiko pilotariak, bikain
Gomazko paleta modalitatean Julen Aranburu Batzokiko pilotariaren txapelketa ona nabarmendu behar da, izan ere, Gipuzkoako banakako gomazko paleta txapelketan, finalerdietara iritsi zen pilotaria. 25-18 galdu zuen Villabonan Behar Zana klubeko Luixaren aurka. Finalera sailkatzea lortu ez bazuen ere, maila handiko txapelketa burutu du Batzokiko pilotariak.
