Gerrak emakumeengan izan dituen ondorioak landuko ditu Etxetxok
Martxoaren 13 eta 16an Gezalan bi emanaldi egingo dituzte. Martxoaren 20an, berriz, frankismoak zigortutako maisu-maistrei omenaldia.
Gerraren ondorioak emakumeengan izenburupean, hainbat jarduera egingo ditu martxoan Etxetxok, Lezoko Memoria Historikoaren Taldeak. Horren barruan antzerkia, dokumental baten emanaldia eta omenaldia egingo ditu. Gezalarako sarrerak aldez aurretik eskuratu behar dira, Lezoko Udalaren webgunearen bitartez.
Martxoaren 13an (20:00etan, Gezalan), Luz quebrada antzerki obra iritsiko da Lezora. 1936ko gerraren ondorioz Espainiako agintean faxistek emakume errepublikazaleei ezarritako errepresioa du hizpide obrak. Teatro Del Barrio konpainiarena da antzezlana.
Martxoaren 19an, berriz, Ama, nora goaz? dokumentalaren txanda (19:00etan Gezalan). 1936ko gerra bizi izandako emakumeen testigantzekin mamitua dago lana, fikzio pasarteak ere dituelarik. Iban Gonzalezek zuzendutako lana da.
Martxoaren 20an, omenaldia. Etxetxok frankismoak zigortutako herriko maisu-maistrei omenaldia egingo die, Herri Eskolan 12:30ean hasiko den ekitaldian. Honakoak izango dira omenduak: Antonia Altuna, Victoria Igarzabal, Jose Las Heras, Maria Paz Ovejero, Miren Gezala eta Ricardo Fernandez.
