Herritarrekin zuntz optikoaren gaia aztertzeko bilera deitu du EH Bilduk
Bilkura martxoaren 3an izango da, Donibaneko udaletxe zaharrean. Koalizioak dituen proposamenak aurkeztuko ditu bertan.
Langile bat, San Pedroko Kale zaharrean zenbait kable instalatzen. [Argazkia: Pasaiako EH Bildu]. 
Pasaiako EH Bilduk bilera deitu du martxoaren 3rako (datorren osteguna), pasaitarrekin zuntz optikoaren gaia aztertzeko eta koalizioak dituen proposamenak aurkezteko. Topaketa Donibaneko udaletxe zaharrean egingo dute, 19:00etan hasita.
San Pedron eta Donibanen interneteko konexioaren egoerari buruzko informazioa eta proposamenak biltzen jarraitzea izango da bilkuraren helburua. Horrekin batera, EH Bilduk joan den urteko ekainetik gaurdaino zuntz optikoaren arazoari konponbidea bilatzeko egindako kudeaketen berri ere emango dute hautetsiek.
Amaia Muguruza zinegotzi izateaz gain, zuzenean kalteturiko bizilagunetako bat ere bada. “Mila etxebizitza baino gehiago gara gaur egun interneteko konexio duina eskuratzeko aukerarik ez dugunak”, deitoratu du sanpedrotarrak, “pandemia aurretik ere jasanezina zen egoera, baina orain larriagotu egin da”.
Zumaiatik Pasaiara
Datorren astean, Pasaiako udal taldeko hainbat kide Zumaian izango dira, bertako alkate Iñaki Ostolazarekin (EH Bildu) batera Zuntz Optikoa Zumaia (ZOZ) proiektu aitzindaria ezagutu eta bertan egiten ari diren lana bertatik bertara ikusteko.
“Proiektu honen helburua zumaiarrei zuntz optiko mankomunatu, aske eta jasangarriko sarea ematea da”, azaldu dute arduradunek; Pasaiako bilkideek gogorarazi dute antzeko proposamena egin zutela eurek ere joan den ekainean Pasaiako Udalean, baina oraindik ez dutela erantzunik jaso.
Berriki iragarri du Loreto Osa Hirigintza zinegotziak (EAJ) “datozen asteotan” zuntza helduko dela Pasaiako etxebizitza guztietara, eta albiste horrekiko irakurketa egin du udalbatzako indar nagusiak: “Uste dugu txostena positiboa dela, baina oso berandu iritsi dela, aipatzen duen Telekomunikazioen Legea 2014koa baita”.
