Igandeko desfileak trafiko aldaketak eta afekzioak ekarriko ditu
Igandeko konpartsen desfileengatik trafikoaren inguruko hainbat neurri ezarri ditu Udaltzaingoak. Ibilgailuak kendu eta zenbait gune itxiko dira, garraio publikoan aldaketak egongo dira, eta aparkalekuak egokituko dira.
Nafarroa hiribidea trafikora moztuko da. Inauterietako igandeko protagonista nagusiak izango dira konpartsak. Desfilea 11:00etan hasiko da Arramendi pasealekuko Errioxa biribilgunean, eta 15:00etan bukatuko da Matxaineko biribilgunean. Honakoa izango du ibilbide osoa: Pontika-Arramendi pasealekua – Errioxa biribilgunea – Tulle – Maria de Lezo – Xenpelar – Biteri – Nafarroako biribilgunea – Nafarroako etorbidea – Galiziako biribilgunea – Nafarroako etorbidea – Zumardia – Matxaineko biribilgunea.
Igandeko desfile hori dela eta, trafikoaren inguruko hainbat neurri ezarri ditu Udaltzaingoak. Alde batetik, ibilgailuak kenduko dira Tulle, Maria de Lezo, Xenpelar, Biteri eta Nafarroa hiribidea kaleetatik; Galizia eta Santa Klara biribilguneen artetik; eta Alaberga 4 eta 6 zenbakien arteko eremutik. Azken gune hori kentzeko arrazoia da taxi geltokia lekualdatuko delako. Gune horiek guztiak larunbateko 21:00etatik igandeko 15:00etara ibilgailurik gabe izan beharko dira.
Igandean, desfilea hasi baino ordu erdi lehenago, gune hauek itxiko dira: Beraun kalearen eta Arramendi pasealekuaren arteko bidegurutzea; Arramendi pasealekua; eta Errioxa biribilgunea.
Horrez gain, erdialdera joan behar duten gidariei eskatzen zaie desfilea egiten den bitartean, 10:30etik 15:00etara, ez dezatela erdigunetik zirkulatu, eta ordezko bideak erabiltzea gomendatzen zaie, hala nola, GI-636 errepideko saihesbidea auzoetara sartzeko.
Desfilearen gunean eta ondoko kaleetan (Koldo Mitxelena plaza, Pablo Iglesias, Biteri 35, Segundo Izpizua eta Morrongilleta 4) dauden garajeetan aparkatzen dutenek desfilearen ordutegia kontuan izan beharko dute ibilgailua erabili nahi badute, ezin izango baita inguru horretatik zirkulatu.
Matxaineko biribilgunetik Gabierrotako biribilguneraino Nafarroa etorbidean aparkatzen dutenek kontuan izan beharko dute desfilea egiten den orduetan ezin izango direla gunera sartu edo bertatik atera.
Aldaketak garraio publikoan
Trafikoa eteteak lau hiriarteko lineetan izango du eragina:
- E01 Pasai Donibane-Donostia.
- E02 Oiartzun-Donostia.
- E03 Pasai Donibane-Donostiako Poliklinika.
- E27 Hondarribia-Donostia.
Diputazio plaza, Zumardia, Gabierrota eta Lartzabal geltokiak kendu, eta Altamira, Arragua eta Lintzirinera eramango dira.
Urbanoaren geralekuak bertan behera geratuko dira, eragindako kaleak trafikoarentzat libre geratu arte. Lehenik eta behin, geldialdia Tulle kalera pasako da, eta, ondoren, Xenpelar eta Morrongilleta kaleetako ohiko geltokiak erabiliko dira.
Aparkalekuak egokituko dira
Trafikoan egongo diren aldaketa eta afekzio guztien eraginez, bi aparkaleku egokituko dira. Horietako bat Touring etorbideko tenis pistakoa izango da, eta ibilgailuak larunbateko 18:00etatik igandeko 18:00etara aparkatu aha izango dira bertan.
Gainera, Miguel Irastorzako futbol zelaia ere ahalbidetuko da ibilgailuak aparkatzeko. Igandean egun osoan zehar egongo da erabilgarri.
