Lezoko ura osotasunean kudeatuko du Añarbek
Añarberi eskumena emateko erabakia atzoko udalbatzarrean hartu zuten, gobernu taldearen aldeko botoekin, eta EH Bilduren kontrakoekin.
Zubitxo kaleko iturria. Añarbeko Uren Mankomunitateak kudeatuko du Lezoko uren %100a aurrerantzean. Atzo egindako ezohiko udalbatzarrean hala erabaki zuten herriko zinegotziek, gobernu taldearen (EAJ eta PSE-EE) aldeko botoekin, eta EH Bilduren kontrakoekin. Horrela, orain arte herriaren eskumen ziren Jaizkibelgo urak ere (Lezoko ur kontsumoaren %30a ziurtatzen dute) Añarberen esku geldituko dira.
Plenoaren aurretik, bai gobernu taldeak zein EH Bilduk erabakiaren aldekotasuna eta kontrakotasuna adierazteko argibideak eman zituzten, koalizioko kideek atzoko udalbatzarrean bertan azaldu zituztenak. Ondokoak dira haien iritziak:
Udalbatzarra
Atzoko plenoan, gobernu taldeak zuzenean hitzarmenaren bozketaren alde egin zuen. EH Bilduk, alta, hiru aukera jarri zituen mahaiaren gainean: lehena, hitzarmena bertan behera uztea; bigarrena, hitzarmenaren barruan puntua gehitzea Lezok hala nahiko balu Jaizkibelgo ur horiek berreskuratzeko aukerarekin; eta hirugarrena, behin hitzarmena bere horretan onartuta, herritarrei akordioaren berri zuzenean ematea, eta haien iritzia kontuan hartzea. Hiru eskaerak ez zituen onartu gobernu taldeak.
Herritarrek ezin izan zuten plenoan egon, alkatearen iritziz segurtasun distantzia ez zelako bermatuko; toki itxietan %100ekoa da aforoa egun Jaurlaritzaren azken dekretuaren arabera. Hori dela eta, eztabaida bitartean EH Bilduko hiru zinegotzi aretotik atera, eta hiru herritarrei esan zieten haien ordez sartzeko, hitz egin zezaten. Bozketaren unean herritarrek koalizioko hautetsiei itzuli zieten aretoko tokia. EH Bilduk alkatearen jarrera salatu du, esanaz tokiko erakundeak herritarren iritzien jabe izan behar direla, adierazpen askatasuna eta herriko erabakietan parte hartzea bermatuz.
