Batelen ikuskizuna Xuxa Urkiaren omenez
Gipuzkoako Batel Ligako seigarren estropada egin zuten larunbat goizean Errenteria-Oreretan. Bi garaipen eskualdera.
Xuxa Urkiaren omenezko VII. Batel Estropada egin zuten larunbat goizean Oiartzun ibaian, Hibaikak antolatua. Gipuzkoako Batel Ligako seigarren jardunaldia izan zen. Bertan, Oarsoaldeko batelek bi garaipen lortu zituzten: nesken Absolutu Mailan Hibaikak, eta nesken Gazte Mailan San Juanek. Azken horretan, nesken gazteen kategorian alegia, Hibaika laugarrena izan zen.
Bestalde, Haur Mailako mutiletan bigarren izan zen San Juan, Orio irabazletik bost segundora. Bertan, laugarren eta bosgarren izan ziren hurrenez hurren San Pedro A eta B, eta seigarren San Juan A. Hibaikaren ontzi mistoa 10. sailkatu zen. Nesken Haur Mailan, berriz, Hibaika zazpigarren izan zen, eta haien B eta C ontziak 10. eta 11. segidan; Zumaia B izan zen bertan irabazle.
Mutilen Promesa Mailan, ordea, San Juan bigarren izan zen, Hibaika seigarren eta San Pedro zortzigarren; kategoria horretan lehena, Hernani. Nesken Promesetan, Hibaika A laugarren, San Juan B seigarren eta Hibaika B hamalaugarren; irabazlea Hernani B izan zen.
Mutil gazteetan urrea Oriorentzat, San Juan A eta B haien atzetik izan zirelarik. San Juan C seigarren gelditu zen, Hibaika A zortzigarren, San Pedro hamargarren eta ondoren Hibaika B.
Azkenik, mutil absolutuen kategorian Donostiarrak irabazi zuen, eta haien atzetik izan zen San Juan A, 18 segundora.
