[Bideoa eta galeria] Astelehenarrean, Eztandak; Asteartebeltzean, 'Hiku Miku Ziriku'
Eztandak taldeak kalejira egin du arratsaldean. Bihar, berriz, 'Hiku Miku Ziriku' liburuxka aurkeztuko dute Gezalan.
Gaur, Lezoko Inauterietako Astelehenarre. Oro har, Inauteri giro ez handiko eguna. Arratsaldean, ordea, Eztandak taldeak kalejira egin du herritik giroa lasaiegi joan ez zedin. Malabaristek, hankapaloek eta musikadun gurdiak erdiguneko kaleak girotu dituzte, pixkanaka batu zaizkien gaztetxoekin (eta haien guraso nahiz aiton-amonekin) batera. Hemengoak bertako bideoa eta hainbat argazki dira.
Bihar, berriz, estreinaldi handia. Trapujale Taldearen ekimenez egin den Hiku Miku Ziriku liburuxka aurkeztuko dute 18:30ean Gezala Auditoriumean. “Ziriku bihotza duten lezoarrentzat” egindako lana dela argudiatu dute egileek: Saioa Muguruzak egin ditu testuak, Kepa Etxebarriaren ilustrazioekin. Ekitaldi irekia da, beraz, Lezoko Inauterien azken egunean, herriko Inauteri giroko liburuaren nondik norakoak azalduko dituzte. Trapujale ez dute epaituko. Baina nonbaitetik agertuko dela ziurtzat eman daiteke.
