Gizarte bidegabekerietan fokua jarriko duten dokumentalak
Udalak eta OzZinemak urte osoko elkarlan bati ekin diote gizarte bidegabekerietan sakontzeko. 'Sedimentos' filma da lehen proiekzioa, eta gaur ikusi ahal izango da Niessenen.
'Sedimentos' filma. Udalak eta OzZinemak urte osoko elkarlan bati ekin diote gizarte bidegabekerietan, desberdintasun pertsonaletan, hutsune legaletan, eta intolerantzia mota orotan fokua jartzen duten film dokumentalak urte osoan zehar proiektatzeko. Horren harira, Giza Eskubideen urraketa ezberdinen lekukotzak azaleratuko dira hainbat film dokumentalen bidez.
Zinema dokumentala gizarteko errealitate ezberdinen isla fidela da, genero zintzoa, eta batzuetan, zaila. Ikuslea estimulatu, eta bizi garen mundua ulertzeko beste leku batzuetan kokatzen laguntzen du. Eta errealitatea, gizarte bidegabekerien etengabeko erakustaldia da.
Hori dela eta, lankidetza hori denboraldi osoan zehar luzatuko da hainbat proiekzioren bidez. Gaur bertan emango da lehen filma, sei emakumeren bidaiari buruzko dokumental bat, enpatiari, indibidualtasunari eta kide izateko beharrari buruzko istorio samur eta dibertigarria. Hainbat jaialditan saritua izan ondoren, Errenteriara iritsiko da Adrian Silvestreren ‘Sedimentos’ filma.
Proiekzio hori gaur arratsaldean ikusi ahal izango da, 19:30ean, Niessen zinema aretoetan. Sarrerak hiru bidetatik eskuratu ahal izango dira lau euroko prezioan: sarrerak.errenteria.eus webgunean, Lekuona Fabrikan eta Niessen Kulturguneko leihatilan saioa baino ordu bete lehenago.
