Irisgarritasun Plana eguneratzen hasi da Udala
Diagnostikoa osatzeko helburuarekin, Udalak Internet bidezko inkesta bat abiatu du herritarrek euren ekarpenak egin ditzaten. Inkesta hori martxoaren 8a bitarte bete ahal izango da.
Alabergako igogilua irisgarritasun planaren baitan egin zen. Errenteriako Udalak herriko Irisgarritasun Plana eguneratzeari ekin dio. Horretarako, Internet bidezko inkesta bat abiatu du herritarrek bete dezaten, diagnostikoa osatzeko helburuarekin. Plan horrek udalerriko irisgarritasunaren egoera ebaluatuko du, bai eta udalerriko irisgarritasun arloko jarduketa garrantzitsuenak ere, hiri-inguruneak, espazio publikoak, udal eraikinak, garraio publikoa eta informazio sistemak egokitzen joateko.
Udalaren lehen Irisgarritasun Plana 2003. urtean egin zen, eta 2011n berrikusi zen Errenteriako auzo guztietara begirada zabaltzeko, igogailu eta ibilbide irisgarrietatik abiatuta zati altuenekiko konexioa hobetzearen alde eginez.
Azken hamar urteetan honako hiri igogailuak garatu dira: Apeadero kalekoa, Urdaburu kaleko biak, Basanoaga Sorgintzuloko biak, Ramon Maria Azkue Markolakoa, Alabergako biak, Urbaburu-Jaizkibelgoa eta Beraunen Jesus Gurudiko biak. Horrez gain, arrapalak ere egin dira honako guneetan irisgarritasuna ahalbidetzeko: Zabaleta Anaiak, Urdaburu kalea 1, Jaizkibel kalea 10 eta 12 zenbakiak, Miguel Zabaleta 21 eta 23, Santa Klara 26 eta 28, Uztargi Haur-eskola edota Markola ikastetxea.
Planaren garapen maila handia dela eta, beharrezkotzat jo da Udaletik plana berrikustea, egindako jardueren emaitzak ebaluatuz, jarduketa berriak proposatuz eta daudenak berrikusiz.
Gaur egun, hiri ingurunea eta erabilera publikoko eraikinak aztertzeko lan bat egiten ari da Udala. Programa hori gauzatzen ari da, bai teknikari espezializatuek udalerria zuzenean behatuta, bai hainbat elkarrizketa eta kontraste eginda, besteak beste, erretiratuen elkarteekin, familia gazteekin eta kirol egokituko elkarteekin.
Diagnostiko hori auzotarren emandako informazioarekin osatuko da, zailtasunak eta hobetzeko puntuak nabarmentzeko. Horretarako, Udalak webgunean herritar guztientzako inkesta ireki bat prestatu du. Gaur ireki du, eta martxoaren 8a bitarte bete ahal izango da. Horrez gain, Irisgarritasun Planarekin zerikusia duten ekarpenak egin daitezke partaidetza@errenteria.eus helbide elektronikora idatzita.
Bide telematikoaz gain, irisgarritasun gaiekiko sentikorrak diren pertsonen eta kolektiboen ikuspegia jasoko du prozesuak. Diagnostikoaren ondoren, plana bigarren fase propositibo batekin osatuko da, eta herritarren parte hartzea ere barne hartuta, dokumentu hori osatuko duten etorkizuneko ekintzak jasoko ditu.
