Emakumeen Egunaren harira, jaialdia antolatu du Itaiak Lezon
Hilaren 5erako arratsalde pasa antolatu dute Txerrimuñon. Hipersexualizazioari buruzko gogoeta egingo dute, besteak beste.
Txerrimuñon garatuko dute jaialdia. Oarsoaldeko Itaiak Martxoaren 8ra begirakoen berri eman du. Emakumeen Nazioarteko Egunari lotutako jaialdia egingo du hilaren 5ean (larunbatean) Lezoko Txerrimuñon. Aurretik egindako gogoeta fasearen ondorio da larunbatekoa.
Hasteko, 18:00etan, hipersexualizazioari buruzko proiekzio bat egingo dute, ondorengo eztabaidarekin. “Emakume langileok kultura sexualaren objektu izanik, bete-betean eragiten du gure bizimoduan. Sexualizazioa norma kultural bilakatu da eta emakumeenganako zapalkuntzan sakontzen dute”.
Gogoetarako tartearen ondoren, kantaldi akustikoaren txanda iritsiko da 19:30 inguruan. Ondoren, 21:30ak aldera, Alargun Beltzak emakume musikari taldeak hartuko du Txerrimuñoko oholtza, eskualdeko nahiz Donostiako musikariz osatutako taldeak alegia. Elektrotxaranga trazakoa da taldea.
Arratsaldea bitartean, zer jan eta edan egongo dela jakinarazi dute Itaiakoek.
Martxoaren 8an, Donostian egingo den manifestazioarekin bat egin du Oarsoaldeko Itaiak: 17:45ean gelditu dira Gipuzkoa plazako ordularian.
