Trintxerpeko Inauteriak ospatzeko egitaraua prestatu dute
Bihar, asteazkena, balkoiak koloretako oihalez apaintzera deitu dute. Ostiral, larunbat eta igandean atsedenik ez dute hartuko.
Trintxerpeko Inauterietako artxiboko irudia. Konpartsek larunbat eta igandean hartuko dituzte kaleak. 
Jakina denez, datorren asteburu honetan helduko dira inauteriak Trintxerpera. Iaz pandemiak ospakizuna bertan behera utzi izanagatik, inoiz baino gogotsuago daude trintxerpetarrak aurten kolore biziz josteko kaleak, eta egitarau oparoa prestatu dute horren adierazle.
Jarraian, datozen egunetarako aurreikusitako jarduerak:
- Asteazkena, hilak 2. Balkoiak koloretako oihalekin apaintzera deitu dute, inauteriei ongi etorria egiteko.
- Ostirala, hilak 4.
- 19:30ean Kaldereroak Serafin Esnaolatik abiatuko dira, gero Euskadi Etorbidea zeharkatu, Jaizkibel eta Azkuene kaleak hartu, eta bueltako bidea egiteko azkenik, Euskadi Etorbidetik Serafin Esnaolara berriro.
- 21:00etan konpartsen aurkezpena egingo dute frontoian. Ohartarazi dute gehienezko edukiera betetzean ezingo dela beste inor sartu gunera.
- Larunbata, hilak 5.
- 12:30ean erraldoiak eta buruhandiak azokatik aterako dira Euskadi Etorbiderantz.
- 17:00etan konpartsa eta kuadrillen desfilea. San Pedrotik abiatuko dira, Esnabide 26 zenbakitik, Correosera arte. Honako taldeek parte hartuko dute: Boveda, Txassis, Fama, Showtime, Gurea eta Trikuharri.
- 19:30ean elektrotxaranga, Trintxerpeko Korkoiburuek antolatuta. Ibilbidea: Correos, Gudarien plaza eta Serafin Esnaola.
- 21:00etan, eguna ixteko, Inauteri Jaia ospatuko dute Karmengo Amako gimnasioan, Ekaitza Gazte Taldeak antolatuta.
- Igandea, hilak 6.
- 17:00etan konpartsa eta kuadrillen desfilearen bigarren atala. Ibilbidea eta parte hartzaileak berdinak izango dira.
- 19:30ean Bakailaoaren ehorzketa, Korkoiburu eta itsasoko lagunekin, Azkuenetik Euskadi Etorbidera, Portuan bukatzeko.
