Bost domina ekarri ditu etxera Pasaia Kayakek azken norgehiagokan
Ur lasaietan urrezko domina bat eta brontzezko hiru ekarri dituzte etxera bakarkako lanean, gehi zilarrezko beste bat taldekako sailkapenean.
Maddi Tarragona eta Maika Terroso talde lanean aurrera eginez, Urola ibaiko uretan, ziabogarako bidean. 
Bost domina erdietsi dituzte Pasaia Kayakeko palistek Gipuzkoako Ur Lasaietako Piraguismoko Neguko Txapelketan, Zumaian. Urrezko domina bat eta brontzezko hiru ekarri zituzten etxera bakarkako lanean, gehi zilarrezko beste bat taldekako sailkapenean.
Ion Carballo da urdinen izarretako bat, eta azken norgehiagokan ere ez zuen hutsik egin, laugarren aldiz jarraian irabazi baitzuen Gipuzkoako txapela Senior kategorian. Iñigo Lois taldekidea ere “bikain” aritu zela adierazi dute arduradunek hirugarren sailkatuz, bigarren domina emanez horrela talde pasaitarrari. Emakumeek beste bina domina lortu zituzten, brontzekoak horiek, Laura Zunzunegi antxotarrari eta Eukene Saez errenteriarrari esker.
Bosgarren domina taldekako sailkapenean lortu zuen Pasaia Kayakek, bere palista guztiek –domina lortu zutenek, nahiz ez zutenek– egindako lan txukunari esker, eta bigarren izan zen marea urdina Santiagotarrak lehiakide indartsuaren atzetik, eta etxeko Itxas-Gain taldearen aurretik, podiuma osatuz.
Datorren larunbatean onena eman beharko dute etxekoek Irunen, Euskadiko Txapelketan.
