'Hiku Miku Ziriku', abentura handi bat
Zirikuen figuraren gaineko liburua da 'Hiku Miku Ziriku'. Atzo aurkeztu zuten Gezala Auditoriumean, Ziriku eta guzti.
Zirikuak dira liburuaren funtsa. Atzo aurkeztu zuten Trapujale Taldearen ekimenez argitara atera den Hiku Miku Ziriku liburuxka, Gezala Auditoriumean. Saioa Muguruza Sarasua lezoarrak egin ditu testuak, eta horiei ilustrazioekin indarra eman die Kepa Etxebarria Sagarzazu oreretarrak. 12-15 urte bitarteko gazteei begirakoa da, eta Lezoko Inauterietako Zirikuen figuran sakontzeko tresna. Lezon, Kultura Aretoan (goizez) eta Oroitzene AEKn (arratsaldez) izango da salgai 8 euroan; Errenteria-Oreretako Mirentxu liburu dendan nahiz Oiartzungo Laboren ere eskura daiteke. Liburuen xehetasunez aparte, mezu garbia zabaldu zuten atzokoan Trapujale Taldekoek: azken bi urteetan Inauteriak nahi bezala ezin ospatu arren, taldeak irmo jarraituko du herriko Inauteriak antolatzen, “erretiratu arte eta gehiago izango gara lanean”.
Zirikuen bizitzaren berri ematen da abentura liburuxkan, “abentura zoragarri bat da. Trapujale Taldea ere oso pozik dago emaitzarekin. Udala ere eskertu nahi dugu, proiektu txiki honetan jarritako gogoagatik”. Ion Pombar Kultura zinegotziak ere izan zuen zer esan agerraldian. Eskerrak eman zizkien Trapujale Taldekoei, “herri senan eta ondarean sakontzen balio dute horrelakoek. Eskertzekoa da Trapujale Taldeak jarri duen gogoa, eta ideiarekin etorri zirenetik, baiezkoa eman genien”.
Kepa Etxebarria eta Saioa Muguruza, atzoko aurkezpenean.
Saioa Muguruzak nahiz Kepa Etxebarriak hartu zuten mikrofonoaren gidaritza ondoren. Testuen egileak aipatu zuen sormen lana egiteko prozesua iaz hasi zela, Trapujale Taldeak hari Zirikuen gaineko kontakizuna egitea eskatuta. “Beti izan dut idaztea gustuko. Pozik hartu nuen enkargua. Oreretakoa naiz izatez, eta aukera paregabea zen niretzat, aldi berean, herriari esker ona adierazteko”. Lezoarrek Zirikuen gainean zer iritzi duten ikertu zuen Muguruzak; jasotakoa, oro har, ezkorra zen, “gaiztoak ziren Zirikuak, gezurtiak. Hori entzunda pentsatu nuen: inor ez da guztiz gaiztoa beti, inor ez da guztiz gezurtia beti… Denok dauzkagu gure argi-ilunak. Horri heldu nion ipuina idazteko”. Ziriku bihotza edukitzea zer den azaldu nahi izan du Muguruzak landutakoarekin. Aldi berean, sormen prozesuan Etxebarriarekin egindako talde lana goraipatu zuen.
Etxebarriak, bere aldetik, zehaztu zuen hura ere oreretarra dela, eta ez zuela guztiz menderatzen Lezoko Inauterien nondik norakoa, “Zirikuen gaineko datu askorik ez nuen. Baina sakontzen hasi nintzen, Zirikuek zer ospe eta esanahi duten aztertu nuen. Saioaren testuekin batera, oso lan polita iruditu zait. Herrietan bizi diren kontu hauek oso bereziak dira bertakoentzat, beharrezkoak dira horrelako lanak egitea, eta herriek dituzten harribitxi horiek zaintzea”.
Ipuinaren gaineko irakurketarik ez zuten egin. Baina Muguruzak sormen lanaren bukaera parteko pasarte bat Gezalan zirenekin partekatu zuen: “Hiku Miku Ziriku. Jaizkibelen korrika, artzainei deika. ‘Nola egingo diat, dinat, dizut lagun. Zuka, ala hika?’ Hiku Miku Ziriku!”.
Aitortza
Liburua erosten dutenek orrialdeak bereizteko markaorria eskuratuko dute. Aitortza bat da bere horretan markaorria. Zendu diren Trapujale Taldeko bi laguni omen egingo diete horiekin, Jabier Anuariz eta Mikel Osa. “Herrigintzaren eta bertako kulturaren bi lagun ziren eta dira. Gure bihotzean eramango ditugu aurrerantzean egingo ditugun ekitaldi guztietan”. Aldi berean, liburuaren promozio bideoa egiteagatik Aitzol Saizarri eskerrak eman zizkieten. «Bat, bi eta hiru: Hiku Miku Ziriku!”.
