Arratoiak garbitzeko lanei ekin die udalak
Karraskarien ugaltzea ekiditeko pozoia jarri dute Pasaiako Udaleko Zerbitzu saileko langileek "leku estrategikoetan".
Bizilagun eta etxeko animalientzako arriskutsuak ez diren puntuetan jarri dute pozoia; hala nola, ur beltzetan. 
Herritarrek behin eta birritan egindako eskaerari erantzunez, Pasaiako Udaleko Zerbitzu sailak “arratoi garbiketarekin zerikusia duten hainbat lan” egiten hasi dela aditzera eman du. Oraingoz Antxoko zenbait puntutan eta Trintxerpeko Andonaegi inguruan hasi dira lanean, eta datozen egunotan beste barrutietara ere zabalduko dute saiakera.
Pasaiaren garbiketa eta mantentze lanen planaren barruan jasota dago karraskarien ugalketa ekiditea; hori horrela, animalien agerpenari aurrea hartu nahi diola iragarri dute arduradunek, eta arratoiak hiltzeko erabiltzen den pozoia “leku estrategikoetan” jarri dute hartarako.
Langileek ohartarazi dute pozoia bizilagun eta etxeko animalientzako arriskutsu izan ez dadin kokatu dutela: “Sarbide zaileko lekuetan, hala nola, ur beltzetan, argi-puntuetan edo kutxatiletan”.
