[Elkarrizketa] "Argitalpena bada modu bat esateko Zirikuak hor daudela oraindik"
Muguruzaren testuei kolorea jarri die Etxebarriak. Zirikuen gaineko abentura da Trapujale Taldearen ekimenez argitara eman den lana, aurreiritziak "itxuraldatzea" asmo duena.
Kepa Etxebarria eta Saioa Muguruza, liburuaren aurkezpenean. Lezoarrek Zirikuen gainean zer iritzi duten ikertu zuen Saioa Muguruza Sarasua lezoarrak Hiku Miku Ziriku liburuaren testuen egileak; jasotakoa, oro har, ezkorra zen. «Gaiztoak ziren Zirikuak lezoarren ustez, gezurtiak. Hori entzunda pentsatu nuen: inor ez da guztiz gaiztoa beti, inor ez da guztiz gezurtia beti… Denok dauzkagu gure argi-ilunak. Horri heldu nion ipuina idazteko». Ziriku bihotza edukitzea zer den azaldu nahi izan du Muguruzak landutakoarekin. Kepa Etxebarria Sagarzazu oreretarrak egin ditu abentura liburuaren ilustrazioak.
Nolatan sortu zen liburua egiteko aukera?
SAIOA MUGURUZA: Aurten atera bada ere, prozesua iaz hasi zen. Trapujale Taldeak Zirikuen gaineko ipuina idazteko eskatu zidan, baiezkoa eman, eta gustura hartu dudan lana izan da. Horrela sortu zen guztia.
Gaia emanda, horretan sakontzea zaila izan al da?
S. M.: Ez gehiegi. Zirikuei buruz lezoarrei galdezka hasi nintzen, euren iritzia jakin nahi nuen. Denen erantzuna zen gezurtiak eta gaiztoak zirela. Hori entzunda, burura etorri zitzaidan irudi horri buelta emateko ipuina idaztea. Ez dut ospe hori desmuntatzeko saiakera egin, baina beharbada itxuraldatzekoa bai. Inor ez da guztiz gaiztoa, edo guztiz gezurtia. Uste hori irauli nahi izan dut testuetan.
Elkarlanean landu duzue publikazioa.
S. M: Honen guztiaren gauzarik politenetakoa Keparekin elkarlanean aritzea izan da. Zalantzak nituen ea idatzitako hori ondo ulertuko zen. Baina Kepak egindako marrazkiak ikusi nituenean, zalantza horiek uxatu egin nituen. Hitzei kolorea eta erliebea eman die, eta emaitzarekin oso gustura nago.
KEPA ETXEBARRIA: Erraza izan da elkarlanean aritzea. Saioak testuak idatzi eta nik horiek jasotzerakoan berehala ulertu nuen zer azaldu nahi zuen. Pixkanaka hasi nintzen hizki horiei irudia jartzen. Prozesu bat izan da. Magia egitea da: batek idatzi, besteak marraztu. Baina hori guztia nola batzen duzu gero? Testuekin banuen ilustrazioak egiteko helduleku bat. Izan ere, nik ez nituen ezagutzen Zirikuen nahiz Lezoko Inauterien gainekoak. Kontatu didatenarekin, nik ikusitakoarekin eta Saioaren testuekin jakin izan dut nondik egin aurrera. Horrelako herri batean gisa honetako zerbait sortzea sekulakoa iruditzen zait, magia da.
Haurrei eta gazteei begirakoa da argitalpena. Liburua irakurrita, zein iritzi duten jakitea gustuko zenukete?
S. M.: Nahi gabe ere entzungo dugu zer iritzi duten, horretaz ziur gaude.
Iaz eta aurten, Zirikuak, Trapujale eta konpainia ez dira Lezoko Inauterietan izan, osasun egoeragatik. Testuinguru horrek zaildu al du zuen lana? Zer eragin izan du?
K. E.: Argitalpena bada modu bat esateko hor daudela oraindik, ez direla joan, eta berriz ere bueltan izango direla in0lako zalantzarik gabe.
S. M.: Uste dut inoiz baino beharrezkoa zela Hiku Miku Ziriku bezalako lana sortzea. Bizi dugun osasun egoera zailagatik horrelako zerbait egitea. Kontakizun honekin jendearen animoa igotzen zerbaitetan lagundu badezakegu, bada aurrera. Dena itzaltzen ari den momentu honetan irrika eta ilusio pixka bat ere behar dela uste dugu.
Saioa, irakasle zara. Baduzu esperientzia gazteen sentsazioak kudeatzen. Baina sormen prozesuan pentsatu al duzu euren iritzian?
S. M.: Gauza asko elkartu dira tartean. Pandemia, ezin atera hori, abentura bat bizitzeko gogoa. Gazteek zer duten gogoko, eta zer falta zitzaien kontuan hartuta emaitza bat lortu dugu. Badut esperientzia, bai, DBHko gazteekin. Hemen pixka bat beherago joan behar izan dut, eta ea lortu dudan.
Esan duzue abentura antzekoa izan dela sormen prozesua. Zergatik?
S. M.: Bai, hala izan dela esan daiteke. Abentura honek segidarik izango ote duen? Kepa eta ni ezagutu gara, eta auskalo zer gerta daitekeen aurrerantzean.
K.E.: Liburua ere abentura bat baita. Dena da abentura bat. Bizitza ere abentura da.
LEZON, OIARTZUNEN ETA ERRENTERIA-ORERETAN EROS DAITEKE
Haur eta gazteei begirakoa da Hiku Miku Ziriku, eta Lezoko Inauterietako Zirikuen figuran sakontzeko tresna. Lezon, Kultura Aretoan (goizez) eta Oroitzene AEKn (arratsaldez) izango da salgai 8 euroan; Errenteria-Oreretako Mirentxu liburu dendan nahiz Oiartzungo Laboren ere eskura daiteke. Trapujale Taldeak intentzioa du Pasaian ere salgai jartzeko. Lezoko Udalaren babespean argitaratu dute.
Liburua erosten dutenek orriak bereizteko markaorria eskuratuko dute. Aitortza bat da bere horretan markaorria, zendu diren Trapujale Taldeko bi laguni omenez, Jabier Anuariz eta Mikel Osa: «Gure bihotzean eramango ditugu aurrerantzean egingo ditugun ekitaldi guztietan».
