Astelehenak pentsiodunenak izaten jarraitzen dute
Hilabeteko lehen astelehenean pentsiodunak kalera atera dira beste behin euren aldarrikapenekin jarraitzeko. Otsaileko plenoan sartu zituzten bankuen inguruko mozioen inguruko aldarrietan zentratu dira gehienbat.
Pentsiodunen mobilizazioa Niessengo biribilgunean. Hilabeteko lehen astelehena eurena dela argi utzi dute pentsiodunek. Lehenik eta behin, Martxoaren 8aren bezpera dela eta, emakumeak gogorarazi nahi izan dituzte, eta jakinarazi dute eurak ere hor egongo direla emakumeen eskubideak aldarrikatzen jarraitzeko. Horrez gain, daramaten lau urteko borrokan, “gure eskubideak defendatu eta hainbat lorpen erdietsi” dituztela azpimarratu dute, eta “1080 euroko gutxieneko pentsioa lortu arte borrokan jarraituko” dutela argi utzi dute.
Aldarrikapen nagusiak, baina, bankuekin izan dituzten arazoekin lotutakoak izan dira. Otsailaren 22an egin zen udal plenoan mozioak sartu zituzten jende heldu, pentsiodun eta zaurgarrienei banku irisgarritasuna errazteko eta bankuetan ematen den arreta hobetzeko. Mozioa zortzi puntuz osatu zuten, eta udal taldeek onartu zutela eutsi dute pentsiodunek. Tankerako mozioak Euskal Herri osoan ere sartuko dituztela zehaztu dute. Aldarrikapen nagusi moduan, banku guztiek bulego bakoitzean leihatila bat lanaldi osoan irekita edukitzea eskatu dute, lanaldi osoan aurrez aurreko zerbitzua bermatzeko herritar guztiei, eta lehentasunez 65 urtetik gorakoei. Gainera, lokaletara sartzeko murrizketak dauden bitartean, bankuek itxarongelak jar ditzatela eskatu dute, ilarak kalean sor ez daitezen.
Aldarrikapen horiek gauzatzeko asmoz, gaurko manifestazioan Errenteria-Oreretako Erdigunean dauden banku sukurtsal guztietan gelditu dira plenoan onartutako zortzi puntuak bete ditzaten eskatzeko. Hori dela eta, Laboral Kutxa, Rural Kutxa, Kutxa, La Caixa, Bankinter, Santander, BBVA, Sabadell eta Bankoa banku sukurtsalen aurrean gelditu dira euren aldarriak manifestatzeko. Horrez gain, Sabadellen aurrean azken asteetan salatu den etxegabetzeaz kexatu dira, pentsiodunak sostengua ematen egongo direla argi utziz.
Apirilaren 4koa izango dute hurrengo hitzordua pentsiodunek. Ordurako, plenoan onartutako aldarriak zertan dauden ikusi nahi dute, eta animatu nahi izan dute ikustera denbora horretan nolako arreta eskaintzen den bankuetan.
