Ur Lasaietako Euskadiko Txapelketan onena eman du marea urdinak
Pasaia Kayakeko ordezkariak Irunen izan ziren joan den igandean. Espainiako Txapelketarako prestatzeko baliatu dute norgehiagoka.
Eukene Saez azken txanpan helmugaratzen. Atzean, aurkari baten piraguaren branka. 
Joan den igandean lehiatu zen Irunen Ur Lasaietako Euskadiko Txapelketa eta, nola ez, bertan izan ziren Pasaia Kayakeko ordezkariak. Txema Yarza presidenteak aitortu du “onak” izan zirela orduan ere, azken lehietako martxari jarraiki, erdietsiriko emaitzak.
Proba nagusiak, hots, Senior gizonen lehiak, ireki zuen norgehiagoka. Ion Carballok ezin izan zuen orduan garaipena lortu, Santiagotarrak taldeko Eneko Egigurenek gainditu egin baitzuen azken esprintean.
Aipamen berezia egin dio Yarzak Maialen Vitoria altzatarrari Kadete mailan egindako “lan bikainagatik”. “Ez zegoen garaipenerako faboritoen artean”, aitortu du, “baina buruz buruko oso estua izan zuen Santigotarak taldeko hirugarren ordezkari Paula Severianorekin azken txaparaino, eta segundo pasatxoko tartearekin eutsi zion hirugarren postuari, Gipuzkoako Txapelketako arantza kenduta”.
Beteranoen kategorian, Aitor Arrieta bigarren izan zen Donostia Kayakeko ordezkariaren atzetik eta Iñaki Fernandezek ere postu bera eta zilarrezko domina lortu zituen Donostiako Atletikoko ordezkariaren atzetik.
Eskualdeko taldearen urrezko domina bakarra Eukene Saez errenteriarrak lortu zuen, kategoria guztietako neskekin lehian. Taldekako sailkapenean, hirugarren izan zen Pasaia Kayak. “Ez da modu txarra hamar egun barru Sevillan jokatuko den Espainiako Txapelketa prestatzeko”, dio lehendakariak.
