Kromosoma Tailerrak ‘Jostagailuak’ erakusketa jarri du ikusgai
Kromosoma Tailerrak eta June Monroyk abiatutako erakusketa martxoaren 27a arte ikusi ahal izango da. Horrez gain, bi tailer antolatu dira proiektua herritarrei hurbiltzeko.
Jostagailuak erakusketa. Kromosoma Tailerrak ikusgai du jada ‘Jostagailuak’ erakusketa, itxuraz aurkakoak diren bi diziplinen arteko fusioa uztartzen dituena, digitala eta artisautzaren arteko fusioa lantzen baititu. Erakusketa hori Kromosoma Tailerraren eta June Monroy collagistaren artean egin dute, eta lanaren helburua da sinergiak aurkitzea eta teknika tradizionalen eta digitalen arteko topagunea sortzea. Zur gainean digitalki sortutako irudien transfusioaren bidez osatu da fusio eta elkarlan hori. ‘Jostagailuak’ hamabi collage digitalek osatzen dute, eta Monroyk estetika oniriko eta surrealista sortu nahi du bere obra bakoitzean.
Kromosoma Tailerraren erakusketaren helburua da bertako artistak ezagutaraztea eta haien lanak erakustea. Gainera, proposamen bateratu bat sortzea da helburu nagusietako bat, zurarekin eta artisautzarekin egindako lana gizartera hurbiltzeko eta ogibide hori erakutsi eta sustatzeko hainbat kanal, formatu eta espaziotan.
Erakusketa martxoaren 27a arte egongo da ikusgai Kromosoma Tailerrak Erdiko Kaleko 13. zenbakian duen egoitzan. Horrez gain, proiektua herritarrei hurbiltzeko helburuarekin, bi tailer antolatu dira Kromosomako egoitzan bertan. Horietako lehena larunbat honetan izango da, hilak 12, 11:00etatik 13:00era. Bertan, collage-mural kolektiboa osatzeko tailerra egingo da. Hurrengoa, datorren larunbatean izango da, hilak 19, 11:00etatik 13:00era. Bigarren saio horretan zuraren gainean inprimaketa digitalak egingo dira.
Tailerretan parte hartzeko, aurrez izena ematea beharrezkoa da. Horretarako, interesdunek kromosomatailerra@gmail.com helbide elektronikora idatzi edo 636 89 85 43 telefonora deitu beharko dute.
