Elkar+ekin Dantzan, Lezon
Elkarteen eta bertako boluntarioen lana aitortzeko egitasmoa da Elkar+ekin. Horren barruan, dantzarien txanda izango da igandean.
Atzo aurkeztu zituzten igandekoak. Tartean izan zen Aritz Salamanca lezoarra. Elkar+ekin Gara! egitasmoaren barruan, Elkar+ekin Dantzan egitasmoa egingo dute Euskal Herriko herri askotan igandean (hilaren 20an). Lezoko dantzariek bat egin dute egitasmoarekin. Elkar+ekin egitasmoa herrietako elkarteen eta boluntarioen lana aitortzeko sortu zuten, eta horren segida da Elkar+ekin Dantzan baina dantzarien eta dantza taldeen esparrura eramana. EIBE elkartea da egitasmoaren sustatzailea.
Beraz, igandean, dantza Lezon. Herrian kultur arlo horretan dauden eragileak kalera aterako dira, nahiz norbanako dantzazaleak ere. Honakoa da egitaraua:
- 11:15ean, Gurutze Santuaren plazan bilduko dira herriko dantzariak: Murixkakoak, Lezoko Dantzazaleak taldekoak, Betizutik taldekoak, Zubitxokoak nahiz herriko bestelako dantzariak.
- 11:35ean, Elkar+ekin Dantzan iniziatibako manifestua irakurriko dute.
- 11:40etik 12:10era, taldeen emanaldiak.
- 12:20ean, Munttarpe Txistulari Bandak 10-15 minutuko erromeria, dantzari guztiek elkarrekin dantza egin dezaten.
Igandeko iniziatibak badu abestia, eta bideoklipa. Hemen klik eginda ikus daiteke. Gainera, iganderako hiru koreografia egitea proposatu diete herriz herrikako dantza taldeei. Horien osaketan parte hartu dute, besteak beste, Aritz Salamanca lezoarrak eta Eneko Gil errenteriarrak. Bat muxiko erakoa da, besteal euskal dantzekin harremana du, eta hirugarrenak dantza garaikide trazak dauzka.
