Pasaia HerriLab, adinekoen arreta etxera hurbiltzeko
Adineko 10 pertsonetatik 8k euren etxean bizitzen jarraitu nahi dute. Sistema behar horretara gerturatzeko ahalegina da Zaintza HerriLab.
Aldundiko nahiz inguruko udalerrietako alkateek bat egin dute goizeko topaketan. 
Gaur goizean 180 profesional bildu dituen lan jardunaldi bat egin da Juanba Berasategin; arrazoia, Pasaia Zaintza HerriLab proiektua aurkeztea. Mendekotasun eta hauskortasun egoeran dauden herritarren bizi kalitatea hobetzea du helburu iniziatibak, euren etxean bertan bizitzen jarrai dezaten bermatuz. Azken hori da adineko 10 pertsonetatik 8ren nahia.
Markel Olano Gipuzkoako diputatu nagusiak eman dio hasiera jardunaldiari, Etorkizuna Eraikiz proiektuaren barruan eta Adinberrirekin batera, aldundia garatzen ari den Zaintza HerriLab estrategiaren nondik-norakoak azalduz. Olanoren ustez, Pasaia aitzindari bihurtu da etorkizuneko zainketen garapenean, adinekoen arreta etxera hurbiltzen duen “ekosistema berritzaileari” esker.
Ekosistema horretan, adinekoen arreta euren etxeetara hurbilduko da, eta zainketen jarraitutasuna bermatuko da, udal eta foru zerbitzuak, osasun zerbitzuak eta komunitate zerbitzuak integratuz. Erabiltzaileen nahiz familien egunerokotasuna erraztu nahi da horrela. Adibide bat jarri du diputatuak: Bakarrik bizi den adineko pertsona bati, anbulatorioko bere mediku edo erizainaren bidez, edo udaleko gizarte zerbitzuen bidez, behar dituen zerbitzu eta zainketa guztiak eskaini eta etxera hurbilduko zaizkio.
Prebentziorako
Zaintza estrategiak mendekotasunaren eta hauskortasunaren prebentzioan sakondu nahi du autonomia pertsonala eta iraupen luzeko zainketak bultzatuz eta, aldi berean, zaintzaileei ere laguntza eskainiz.
Horretarako, ekosistema bakar batean konektatzen eta integratzen dira gizarte, osasun eta komunitate zerbitzuak, adinekoen hauskortasuna prebenitu eta antzematea ahalbidetuz, baita balizko mendekotasun egoerak atzeratzea ere.
Izaskun Gomez Pasaiako alkateak adierazi du Pasaia HerriLab-ek bi helburu dituela udalerriarentzat: “Adineko pasaitarren bizi-kalitatea hobetzea, eta Pasaia erreferentziazko udalerri bihurtzea adinekoen arretaren eta zaintzaren sektorerako, potentzial handia baitu gure udalerrirako jarduera eta enplegu iturri garrantzitsu bihurtzeko”.
Lantaldea
Gaurko jardunaldian bat egin dute ekosistema berriaren garapenean duela ia bi urtetik lanean ari den taldeko kideek: Foru Aldundiko Gizarte Politiketako Departamentua, Adinberri, Pasaiako gizarte zerbitzuak, Osakidetza, eta Eusko Jaurlaritzako Osasun eta Gizarte Politiketako sailak.
Prozesu osoa koordinatzen duen talde eragile horretaz gain, komunitatetik bertatik abiatzen diren bost proiektu berritzaileek kontatu dute zein den haien ekarpena eta nola txertatzen duten beren lana ekosisteman: Etxean Bizi (Matia Fundazioa), OK en Casa, Hauskor (Hurkoa Fundazioa), Adinkide eta UVAF-AGASE (Biodonostia).
Pasaiako Izaskun Gomez alkateaz gain, beste udalerri batzuetako alkateek ere parte hartu dute jardunaldian: Donostiako Eneko Goiak, Usurbilgo Agurtzane Solaberrietak, Azpeitiko Nagore Alkortak, Zestoako Mikel Arregik, Hernaniko Xabier Lertxundik eta Urretxuko Jon Luquik.
