100 haur eta nerabek gertuagotik ezagutuko dituzte udal ardurak
Datorren astean zerbitzu eta mantentze lanak bertatik bertara ezagutuko dituzte ikasleek. Politikariei euren kezken berri ere emango diete.
Arizabalo Jauregira ere egingo dute bisita haur eta nerabeek, datozen astearte eta asteazkenean. 
Datozen astearte eta asteazkenean, hilak 29 eta 30, irteera egingo dute Pasaiako hiru ikastetxeetako LH eta DBH-ko ikasleek udal zerbitzuetako lanak zertan diren ezagutzeko, eta aukera izango dute udal teknikari nahiz politikariei euren ezinegon nahiz proposamenen berri emateko gero.
Zerbitzu, Mantentze-lan eta Sareen Sailaren pabiloian nahiz Arizabalo Jauregian bilduko dira goizean goiz haur eta nerabeak, bi taldetan banatuta, udal teknikari, udal zerbitzuetako langile eta irakasleekin batera, zerbitzu horretako langileak eta euren eguneroko zereginak bertatik bertara ezagutzeko.
Guztira, 100 haur eta nerabek ezagutuko dute zerbitzuen sail horrek egunerokoan egiten dituen lanak; artean, kale-garbiketak, zaborraren kudeaketa, konponketak, argiteria, edota lorezaintza. Gazteek lan batzuk egiteko aukera ere izango dute.
Ondoren, Juanba Berasategi Auditoriumera hurbiltzea da asmoa, bertan udalbatzako zenbait politikarirekin bilduko baitira, euren proposamen eta kezken inguruan haiekin hausnartzeko. Hainbat aurreratu dituzte: leku estali gehiago behar dituzte, jolasgune berriak, wifia, eta kaleetako puntu ilunak desagerraraztea.
Haur eta nerabeek Pasaia hobetzeko Eskubidean planaren baitan lantzen ari diren proposamenak ere aurkeztuko dizkiete Pasaiako udal teknikari nahiz politikariei. Gaien artean egongo dira jolaserako eta kirolerako espazioak, jaietako parte hartzea, edota udararako prestatzen ari diren aisialdi eta kirol eskaintza.
