Ordubeteko itzalaldia egingo dute udaletxean 'naturarekin konektatzeko'
Lezoko Udalak, Planetaren ordua dinamikari atxikiz, egoitza nagusiko argi eta tresna guztiak itzaliko ditu larunbatean, 20:30etik aurrera.
Udaletxeak funtsezko ez diren argi eta tresna guztiak itzaliko ditu ordubetez larunbatean. 
Lezoko Udala WWF Naturarentzako Mundu Funtsak mundu mailan antolatutako Planetaren ordua iniziatibarekin bat egingo du datorren larunbatean. Konekta zaitez naturarekin lelopean, ordubetez udaletxeko tresna eta argi guztiak -ezinbestekoak ez direnak, betiere- itzaliko dituzte.
Planetaren ordua urtero egiten da, modu boluntarioan, martxoko azken larunbatean. Saiakeraren xedea herritarrak klima aldaketaren eta biodibertsitate galeraren ondorioei buruz sentsibilizatzea da. Hori horrela, hilaren 27an Lezoko udal eraikin nagusian ez da argirik piztuko 20:30etik 21:30era bitarte.
Lezoko akate Jesus Mari Martiarenak erabakiaren zergatia azaldu du: “Udalak, beste behin, eraginkortasun energetikoarekin duen konpromisoa adierazi nahi du”. Ingurugiro zinegotzi Jose Angel Sanchez bide beretik mintzatu da, eta gogora ekarri du udalak hainbat jarduera abiarazi dituela argiteria publikoan eraginkortasun energetikoa, energia berriztagarrien erabilera eta mugikortasun jasangarria sustatzeko.
