Pasaia Itsas Festibalaren elkartasun atala aurkeztu dute
Zaporeak eta Salvamento Maritimo Humanitario erakundeek nahiz 11 enpresek bat egin dute jaialdiarekin, baina donazio gehiago behar dituzte.
Zaporeak erakundeko zenbait kide, lehenengo Pasaia Itsas Festibalean lanean. 
2022ko Pasaia Itsas Festibala inguruko eragileen arteko sinergiak sortu eta elkartasun sare bat osatzeko ere baliatuko dute. Gaur goizean eman dute arduradunek esparru horretan dituzten asmoen berri, Juanba Berasategin, eta aurreratu dute Zaporeak nahiz Salvamento Maritimo Humanitario (SMH) erakundeek rol garrantzitsua izango dutela aurtengoan.
Maiatzaren 26tik 29ra 150etik gora ontzi tradizional hurbilduko dira badiara, eta horietan, jakina, Europako askotariko herrialdeetako 800 tripulatzaile inguru. Lehen ekitaldian bezala, Zaporeak arduratuko da euren otorduak prestatzeaz, bi helbururekin: espazio komun bat eskaintzea tripulatzaileek elkarrekin bazkaldu eta afaltzeko “oso prezio xumean”, eta bildutako dirua Lesbos uharteko errefuxiatuei laguntzeko bideratzea.
SMHri dagokionez, Aita Mari erreskate ontzia ezin izango da Pasaian egon egun horietan, Mediterraneoan bizitzak salbatzen jarraitu beharko baitu. Ordez, Trintxerpeko moilan benetako patera bat amarratuko dute. Sinbolo horrekin GKEak sentsibilizazio kanpaina bat abiaraziko du.
Kolaboratzaileak behar dituzte
Ahalik eta eragile gehienen laguntza funtsezkotzat jo dute goizeko agerraldian, eta enpresei dei egin diete elikagaiak emanez edota dituzten bitartekoekin lagundu dezaten. Orain arte oso erantzun positiboa jaso dutela aitortu dute antolatzaileek, elikagaien industriako eta banaketako 11 enpresa atxiki direlarik jada.
Elkartasun olatuarekin bat egin nahi duena posta elektroniko bidez jar daiteke harremanetan arduradunekin.
