Azokako jarduerei jarraipena emateko lokala erosi du udalak
Denera bi gunez jabetu da udala, batean Azokako jarduerak birkokatuko dituzte, eta adinekoentzako eguneko zentro bat bihurtuko dute bestea.
Lehen eraikinean dago erositako lokaletako bat, eta azken eraikinaren etxabean bestea. 
Pasaiako Udalak Luzuriagako babes ofizialeko eraikinen etxabeetan dauden bi lokal erosi ditu. Batean egun Azokak hartzen dituen zenbait jarduera birkokatuko dituzte, eta adinekoentzako eguneko zentroa izango da bestea.
Gune handienak 395 metro koadroko azalera du, eta Eskalantegi kaleko 45. zenbakitik sartzen da bertara; besteak 300 metro koadro pasatxo ditu, eta kale bereko 51 eta 53 zenbakietan dago kokatuta. Lehenean Azokako bizilagunak egongo dira, eta adinekoak bestean.
Udal arduradunek argi utzi dute jarduera horien kokapenak behin-behinekoak direla, harik eta Luzuriagako bulego zaharrak eskuratu eta erabilgarri egon arte, azken asmoa baita bertan sortu nahi duten gizarte eta kultura gunean finkatzea horiek gero.
Gaur sinatu du udalak Visesa Eusko Jaurlaritzako Lurralde Plangintza, Etxebizitza eta Garraio Saileko sozietate publikoarekin bi lokalak erosteko kontratua. Horien erosketa prezioa 307.167,17 eurokoa da, eta 45 zenbakiko lokala egokitzeko 400.000 euroko inbertsioa egin beharko du gero tokiko gobernuak.
