Bi igogailu berri, Aita Donostia eta Maurice Ravel kaleen artean
Lanak ekainean hasi eta urrirako amaitzea aurreikusten da. Proiektuak auzotarren mugikortasun eta irisgarritasuna hobetzea du helburu.
Honako itxura izango du inguruak, behin lanak amaituta. Errenteriako Udala Aita Donostia kalearen atzealdearen eta Maurice Ravel kalearen artean bi igogailu jartzeko kontratuaren lizitazioarekin hasiko da. Udalaren arabera, auzotarrentzat irisgarritasuna eta mugikortasuna erraztea du helburu proiektuak, eremu horretan pertsonen joan-etorria nabarmena baita. Hala, bi igogailu jarriko dira gaur egungo eskaileren ordez, igogailu bakoitzaren alboetan eskailera berriak eraikiko diren bitartean. Aipatu bi kaleak eta Juan Crisostomo kalea lotuko dituzte bi igogailuok.
Lanak ekainean hasiko dira, eta dena ondo bidean, urriaren 31rako amaituta egongo direla aurreratu dute. Proiektuaren aurrekontua 469.272,17 eurokoa da, eta 2019-2023 Legegintzaldiko Planean baita Irisgarritasun Planean ere jasota dago.
