Ekonomia eta enpatia euskaraz, Zinealdean
Oarsoaldea Garapen Agentziaren ekimenez Enpatikonomia Jardunaldia egin dute gaur goizean Zinealdean.
Oarsoaldea Garapen Agentziaren ekimenez, Enpatikonomia jardunaldia egin dute gaur goizean Zinealdean, euskaraz. Ingurua eta ingurukoak kontuan hartzen dituen ekonomia inklusiboa da enpatikonomia, eta hori oinarri, hainbat adituk euren esperientziaren berri eman dute. Ia 40 izan dira Zinealdera joan diren parte hartzaileak, gehienak enpresetakoak, baina erakunde publikoetako ordezkariak ere izan dira jardunaldian. Nahi izan duenak online jarraitu ahal izan ditu saioak. Naroa Iturri eta Arantxa Iraola kazetariek gidatu dituzte adituen interbentzioak, elkarrizketa formatu atseginean. Informazio emate, batera jartze, eta sentiberatze jarduera izan da Zinealdeakoa.
Energia aurrezteko bide eta esperientziak; esklusio egoeran dauden pertsonen inklusioa; eta tokiko komunitatearen indarra. Horiek gaurko jardunean landu dituzten gaiak. Hori mamia; baina hori garatzeko bidea euskara izan da, saio den-denak euskaraz izan direlako. “2017an lanketa hasi genuen Oarsoaldea Garapen Agentzian. Konturatu ginen euskara enpresetan sartzeko modu egokiena enpresen gizarte erantzukizunaren bidez zela. Enpresek gizarte erantzukizuna lantzen dute, hainbat arlotan: ingurumena, berdintasuna, langileen baldintzak, pertsonen jatorriaren aniztasuna lantzea… Euskara enpresetan gizarte erantzukizuneko arlo bezala txertatzea egoki iruditu zitzaigun”, azaldu du Oarsoaldeko Euskara Batzordeko arduradun Joxe Luix Agirretxek. Katalunian ikasitakoa aplikatzen ari dira gurean Oarsoaldea Garapen Agentziakoak. Enpatikonomia saioak izan du ekonomia inklusibotik asko, baina baita, zeharlerroan bada ere, euskaratik ere.
Beraz, gaurko enpatia ariketa hiru ardatz nagusi jarraituz egin bada ere, horien transmisioa euskaraz egin da: “Enpresa bat enpatikoa bada, aurreratu itxura ematen du. Hainbat arlorekin enpatiko bada, aurreratua da, baita euskararekin ere. Ingurua eta ingurukoak kontuan hartzen dituen negozioa da enpatikonomia terminoarekin [asmatutako hitza da] izendatu nahi duguna, bezero, hornitzaile, eta inguruko guztiak kontuan hartzen dituena. Hori negozioa berezi bihurtzen du. Gaurkoa jardunaldiak hortaz konturatzeko antolatu ditugu, hiru gai zehatzekin, eta tokikotasunaren aldetik euskarak zer gertutasun eta konfiantza ematen duen azalduz”.
Gaurkoa enpatikonomia jardueren barruko hirugarrena izan da. 2017an eta 2o18an ere egin zituzten. Aurrerantzean bide beretik jarraitzeko asmoa azaldu dute Oarsoaldea Garapen Agentziako kideek.
