50 urteko ibilbidea ospatu du Koldo Mitxelenak
Mendeurren erdia pasa da Koldo Mitxelena sortu zenetik, eta denbora horretan eskolaren parte izan diren pertsonen topagunea sortu zuten larunbatean.
Ekitaldiaren momentu bat. Koldo Mitxelena Institutuak 50 urte bete ditu aurten, eta mendeurren erdi esanguratsu hori ospatzeko, ekitaldi bat egin zen larunbatean Lekuona Fabrikan ibilbide horren parte izan diren pertsonen arteko topagune bat sortzeko. Bertan izan ziren Aizpea Otaegi alkatea, Itziar Ostolaza Hezkuntza zinegotzia eta Marivi Fernandez Berritzeguneko zuzendaria.
Ekitaldi hori antzerkiko lau eszenetan irudikatu zuten, 50 urte horietan irakaskuntzan izandako aldaketak islatzen dituztenak. Eszena horietan eta eszena bakoitzaren artean, garai ezberdinetako irakasle eta ikasleek hartu zuten parte, eta ballet dantza batekin osatu zuten. Dantzariak institutuko bi ikasle izan ziren: June Sesen eta Sara Santano. Horrez gain, Aitor Juez ikaslea pianoarekin aritu zen. Antzerki obrak interpretatu zituztenak ere institutuko ikasleak eta irakasle bat izan ziren: Maider Carballo, Unai Martinez, Nuria Garmendia, Estibaliz Baqeudano, Iker Recuerda, Edurne Martin, Olaia Clota, Ganix Tarragona, Maider Pablo, Eneko Gabilondo eta Iñaki Requejo.
Ekitaldi horretan 50 urte horietan izan diren zuzendariak ere omendu zituzten, eta Errenteria-Oreretako Zaria abesbatzaren emanaldiarekin bukatu zen larunbateko saioa.
