Eskaintza zabalarekin datoz apirila eta maiatza
Emanaldiz josita datoz hurrengo bi hilabeteak herrira. Ikuskizunak larunbatean hasiko dira Node dantza konpainiaren 'Hiru hitzetan' obrarekin.
![](https://oarsoaldea.hitza.eus/site/files/2022/03/kultura.jpg)
Apirila eta maiatza emanaldiz lepo iritsiko dira Errenteria-Oreretara. Gaur goizean Lekuona Fabrikan egindako agerraldian, Maite Gartzia Kultura zinegotziak eta Iker Tolosa Kultura teknikariak datozen bi hilabeteetan ikusi ahal izango diren emanaldien berri eman dute. Ikuskizun horiek Lekuona Fabrikan eta Niessen Kulturgunean ikusi ahal izango dira, eta adin eta gustu guztietarako proposamenekin datoz.
Arte eszenikoen programazioa larunbatean, hilak 2, hasiko da. Dantza garaikidea oinarrian duen Node konpainiaren ‘Hiru hitzetan’ ikuskizunarekin irekiko da zikloa. Obra hori hiru dantza konpainien hiru lan batuz sortu dute: Noderen ‘Emakumeak’; Amaia Elizaran eta Xabier Zeberioren ‘Out’; eta Nerea Gurrutxaga eta Oihana Vesgaren ‘Leiho zikin, zeru garbi’. Bertaratzen direnek dantzara gerturatzeko aukera egokia izango dutela aipatu du Iker Tolosa Kultura teknikariak. Emanaldia Niessen Kulturgunean izango da, 20:00etan.
Gainontzeko emanaldien inguruko xehetasunak Udaleko webguneko Kultura Kreatiboaren sailean aurki daitezke.
Lehen ikuskizuneko sarrerak eskuragarri daude jada sarrerak.errenteria.eus webgunean eta Lekuona Fabrikan. Sarrerak agortzen ez badira, ikuskizunaren egun berean leihatila irekiko da ordu bete lehenago sarrerak eskuratzeko. Gainontzeko emanaldietarako sarrerak, berriz, datozen egunotan aktibatuko dituzte.
Helduentzako ikuskizunen sarrerek 8 euroko prezioa dute, eta familiei zuzendutakoek, berriz, 3 eurokoa. Dena den, badira aipatutako prezioak baino merkeagoak diren emanaldiak. Horrez gain, Kultura Txartelarekin titularrek %20ko deskontua izango dute.