Lezo Institutuko ikasleak herriko memoria historikoaren jabe izan dira
Institutuak eta Etxetxok elkarlanean hainbat jarduera egin dituzte. Egindakoen balorazio baikorra egin, eta aurrera jarraituko dute.
Lezo Institutukom ikasleak, adi-adi Etxetxoko ordezkari baten azalpenak entzuten. Lezoko Institutuko DBH4ko ikasleek herriko memoria historikoa lantzeko eta 1936ko gerraren eraginaren gaineko argibideak jaso dituzte maiatzeko lehen asteetan. Zeregin horretan Etxetxo Lezoko Memoria Historikoaren Taldeko kideen laguntza izan dute.
Hala, institutuak antolatutakoetarako hainbat material eman zituen Etxetxok, hala nola Lezoko haur erbesteratuak erakusketa muntatzeko argazki eta kartelak, nahiz beste hainbat liburu, bideo eta material. Usabiaga-Oiartzabal familiaren monolitora nahiz Iparragirre eremuko esklaboen barrakoietara egindako bisita gidatuetarako gidariak ere jarri zituen Lezoko elkarteak. 29 ikasle izan ziren irteera horretan. Institututik Historiako, Euskarako eta Ingeleseko irakasleek parte hartu dute elkarlanean.
Jardueren balorazio oso baikorra egin dute bai Etxetxok zein Lezo Institutuak. Aldi berean adierazi dute datozen ikasturteetan ere tankera horretako jarduerak egingo dituztela, horretarako hitzarmena egin baitute bi eragileek.
