Pasaia Kayakeko sei ordezkarik onena eman dute Espainiako Txapelketan
Kadete kategorian bost neska izan ziren urdinen ordezkari, eta gizon bat Senior mailan. Onenak 'top 10'-etik hurbil ibili dira.
Nuñez, Vitoria, Carballo, Jimenez, Revuelta, Herce eta Iñaki Lois entrenatzailea, Muiñoseko hondartzan. 
Joan den asteburuan lehiatu zen Muiñosen (Ourense, Galizia) ur lasaietako maratoi erdiko Espainiako Txapelketa eta bertan izan zen Pasaia Kayak, 5 ontzi eta 6 palistarekin lehian, geroz eta esangura gehiago hartzen ari den modalitate berri horretan onena emateko prest.
Aurtengoa txapelketa horren laugarren ekitaldia izan da, Espainia osoko 80tik gora klubetako ordezkariak bildu direlarik bertan, Kadete kategoriatik Seniorretara. Gazteenek 10 kilometroko ibilbidea egin behar izan zuten, bi lehorreko tarterekin (piragua eskutan tramu horretan); eta 16 kilometrokoa, lau lehorreko tarterekin, Seniorrek.
Neska Kadeteen artean, bakarkako lanean, Maialen Vitoria oso txukun aritu zen, 12. postua eskuratuz. Noa Revuelta eta Ainara Jimenez taldekideek 21. eta 24. postuak eskuratu zituzten, hurrenez hurren; Revueltak 2 segundorengatik ez zuen lortu ‘top 20’-ean sartzea. Enara Nuñez eta Irati Herce pasaitarrek osatu zuten taldearen K-2 ontzia kategoria berean, 12. postua lortuz.
Ion Carballok zuen lanik zailena Senior mailan, palista internazionalez betetako lehian. Ondo eutsi zion erritmo biziari, eta hasieratik harrapatu zuen taldetxoaren uberan sartu zen helmugan, 17. postuan.
Oro har, pozik agertu dira taldeko teknikari eta prestatzaileak lortutako emaitzekin. “Marea urdinak ez du hutsik egin Galizian”, adierazi dute, “eta asteburuko hurrengo erronkei begira gaude jada, Iruñean eta Legution”.
