Aurtengo Oreretako Gazte Eguna, ekainaren 25ean
'Hi gazte, esnatu!' lelopean, egitarau zabala antolatu dute egun horretarako. Txartelak salgai daude Sindikato, Arkaitza eta Landare tabernetan.
Gazte Eguneko aurkezpena, Foru plazako kioskoan. Aurtengo Oreretako Gazte Eguna gainean da, eta larunbatean aurkeztu zuten Foru plazan eginiko agerraldian. Gazte Eguna ekainaren 25ean izango da, larunbata, eta askotariko proposamenekin datoz, egitarau zabala osatu dute.
Antolatzaileek aipatu zuten aurtengo Gazte Eguna “duela hilabete batzuk hasi genuen ibilbidea borobiltzera” datorrela. Azkenaldian, “gazteen artean eraldaketa bat beharrezkoa” zela ikusi dute. Hori dela eta, ‘Hi gazte, esnatu!’ dinamika sortu zuten. Dinamika horren baitan, hainbat gai landu dituzte azkenaldian, adibidez, feminismoan edota transmarikabollo borrokan fokua jarri dutenak. Horiek lantzeko, ekintza eta ikastaro ezberdinak burutu dituzte: maskulinitate tailerra, autodefentsa feminista, transmaribibollo tailerra edota afariak.
Horrez gain, urteroko ohiturak alde batera utzi nahi ez dituztela azaldu zuten antolatzaileek. Aurten 27 urte beteko dira Ibon Zabala Gazte Egun bat antolatzen hil zela, eta hura gogoan izango dute urtero egiten duten bezala: “Nahiz eta gure artean ez egon, bere indarra sentitzen dugu, eguneroko antolakuntzan eta batez ere, egun berezi honetan. Horregatik, Gazte Egunak eta gazte antolakuntzak aurrera jarraituko du”.
Horrek guztiak hilaren 25ean egingo du eztanda, eta egitarau anitza osatu dute egun hori ospatzeko:
- 11:00etan: Herri kirolak Lehendakari Agirre plazan.
- 13:30ean: Argazkia Don Vitoko zelaian egindako muralean.
- 14:00etan: Ekitaldia Xenpelarren.
- 14:30ean: Bazkaria Xenpelarren eta bingo musikatua (aukera beganoa egongo da).
- 17:00etan: Elektrobungalowa eta poteoa.
- 20:00etan: Afari eskaintza gaztetxean (aukera beganoa egongo da).
- 22:30ean: Kontzertuak.
Bazkariko txartelak Sindikato, Arkaitza eta Landare tabernetan eskuratu daitezke 12 euroko prezioan.
